O subdelegado do Goberno en Pontevedra, Antonio Coello Bufill, copresidiu, xunto co alcalde, Miguel Ángel Pérez García, a reunión da Xunta Local de Seguridade do Grove, á que tamén asistiron representantes municipais, da Garda Civil, Policía Autonómica, Policía Local e Protección Civil.
Durante a reunión tratouse, entre outros asuntos, a coordinación das forzas de seguridade para dar cobertura á Festa do Marisco que terá lugar o próximo mes de outubro. Este dispositivo constitúe un labor de prevención ante as aglomeracións que xeran este tipo de eventos e supoñerá unha presenza importante de axentes.
Antonio Coello puxo de manifesto, ademais, o importante descenso de delitos e faltas que se produciu neste municipio nos sete primeiros meses do ano; así como un aumento significativo dos delitos esclarecidos neste período. O subdelegado do Goberno agradeceu a colaboración e a coordinación das Forzas de Seguridade do Estado coa Policía Local e Protección Civil.
Durante o encontro informouse tamén da satisfactoria evolución do Plan de Ocio 2014 e do Plan Director. O primeiro está centrado no control de establecementos que poden dispensar bebidas alcohólicas a menores e o segundo está orientado a charlas informativas que se están a impartir nos centros de educación para previr o consumo de alcohol e drogas entre os mozos, así como fomentar un bo uso das novas tecnoloxías e evitar o acoso escolar. Dentro deste último programa, impartíronse xa oito charlas en distintos centros do municipio e espérase manter unha dinámica similar no próximo curso escolar.