Inicio Pontevedra "Vigo SeaFest é o evento gastronómico en torno ao peixe máis importante...

“Vigo SeaFest é o evento gastronómico en torno ao peixe máis importante de Europa”, Carmela Silva

"Vigo SeaFest é o evento gastronómico en torno ao peixe máis importante de Europa”, Carmela SilvaA Deputación de Pontevedra achega 50.000 € para a celebración do “evento gastronómico en torno ao peixe máis importante de Europa”

A Presidenta da Deputación de Pontevedra, Carmela Silva, salientou durante a presentación do festival Vigo SeaFest que este “gran proxecto é unha idea necesaria para pór en valor a historia de Vigo, ligada á actividade do mar, e tamén un investimento de futuro que permitirá que Vigo sexa sendo grande”. A Presidenta provincial participou no acto ao que tamén asistiron o alcalde de Vigo, Abel Caballero, o delegado da Zona Franca de Vigo, David Regades, o director xerente da Cooperativa de Armadores de Pesca do Porto de Vigo (ARVI, organizadora do festival), José Antonio Suárez-Llanos, o director executivo da Axencia Europea do Control da Pesca, Pascal Savouret, a Directora Xeral de Pesca, Acuicultura e Innovación Tecnolóxica, Mercedes Rodríguez, o Presidente da Autoridade Portuaria de Vigo, Enrique César López, e o delegado en Pontevedra de GADISA, Pablo Louro.

O Vigo SeaFest, que Carmela Silva lembrou que “é o evento gastronómico en torno ao peixe máis importante de Europa”, celebrarase entre o 4 e o 7 de xullo como “un evento gastronómico, musical e de ocio ligado á felicidade que perseguimos os seres humanos”. A Presidenta provincial lembrou que “Vigo é sector pesqueiro e témolo que pór en valor a través da gastronomía e da cultura”, no que se enmarca un festival “que pon en valor o sector do mar, o peixe, a gastronomía e o consumo saudable e sustentable do peixe” e no que o público poderá “gozar de pratos exquisitos, de peixes de gran calidade –nas Rías Baixas temos os mellores do mundo– e de accións de promoción de consumo”.

En canto ao consumo, Silva amosouse preocupada xa que “hoxe lemos un informe do Ministerio de Pesca que sinala que o consumo de peixe minguou un 16,5% nos últimos 10 anos, e que ese descenso foi sostido durante os últimos cinco”. A este respecto, Carmela Silva asegurou que “o obxectivo de todas as administracións debe ser promover o consumo de peixe, fundamental para a nosa saúde, e nós ímolo facer a través do Vigo SeaFest”. A Presidenta provincial lembrou que o consumo medio de peixe en España é de 23 quilos ao ano, “e iso é moi pouco”.

Carmela Silva tamén se quixo referir ás medidas sociais implantadas no Vigo SeaFest, como as que permiten visibilizar e acceder ás persoas con diversidade funcional, xa que “todas as persoas somos diversas e temos moito que achegar á sociedade”. En concreto, realizarase un percorrido pola ría de Vigo empregando a lingua de signos. Ademais, iniciativas que buscan visibilizar ás mulleres do sector e que se desenvolverán da man da fundación Fundamar, da que “son unha gran admiradora”, sinalou Carmela Silva. A Presidenta lembrou que “as mulleres debemos ocupar os espazos que nos corresponden: somos as mariscadoras, as traballadoras da conserva ou grandes investigadoras con grandes recoñecementos”.

Pola súa banda, o alcalde de Vigo, Abel Caballero, fixo fincapé na necesidade de “implicar a toda a sociedade nos valores da saúde e da sustentabilidade porque son a nosa forma de entendernos colectivamente” nunha cidade cun “respecto inmenso polo mar, que xa estaba moito antes de que estivera todo o resto, e que lle imos amosar a todo o mundo a través do Vigo SeaFest”.

A Deputación colabora co Vigo SeaFest a través dun convenio co Concello de Vigo polo que a institución provincial achega 50.000 € para deste xeito promover os produtos pesqueiros locais e a súa cultura gastronómica, divulgar a importancia da pesca sustentable, fomentar o consumo do peixe, consolidar o emprego ao promocionar empresas e marcas pesqueiras locais, así como promover Vigo e as Rías Baixas como destino turístico e gastronómico.

Do 4 ao 7 de xullo prevese que pasarán pola cidade arredor de 100.000 persoas para asistir ao Vigo SeaFest. Estarán presentes 12 restaurantes (10 de Vigo, un de Redondela e un portugués) e os e as chefs realizarán pratos exclusivos que se poderán mercar por catro euros. Os peixes que empregarán serán o rape, o lagostino, o bacallau, a quenlla, o gallo, a galiña de mar, o calamar, o atún patudo, o fletán negro, a raia, o marraxo e a pescada.

O SeaFest ten como obxectivos a promoción do consumo de peixe e alertar sobre a necesidade de coidar o medio ambiente con prácticas sustentables. Haberá actividades como obradoiros, exposicións, actividades deportivas, catas, showrooms e tamén concertos, a cargo de The Secret Investments, Le Suite Band, Antonio Lizana, The Swinging Flamingos, Clarence Bekker Band, Black Stereo, Aurora The Betrayers, Thomas Living & Bruno Soares Sax, The Happiness Freqüency, DOUS, Rodri Vegas & Dani Villa & Cheky, La Comisaria, Thomas Living ou Cronicas Pop, entre outros. Os embaixadores serán os televisivos irmáns Torres.

- Publicidade -

ÚLTIMA REVISTA

+ VISTOS

ETIQUETAS

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies