Unha andaina nocturna unirá este sábado, 28 de xullo, os dous principais cumios da Eurocidade Tui-Valença, o Monte Aloia e o Monte Faro, á luz da lúa chea.
Será un percorrido de 17 de quilómetros, de dificultade doada, que comezará ás 23.30 hora española no Aloia e rematará entorno ás 5 da madrugada vendo o amencer no Monte Faro. Esta novidosa proposta forma parte do calendario de Andainas Saudables da Eurocidade.
O percorrido proposto, en cuxo deseño se tivo moi presente a seguridade dos participantes, comezará no Parque Natural do Monte Aloia, baixará ata Tui onde percorrerá o Paseo Fluvial e cruzará pola vella Ponte Internacional cara Valença. O traxecto brindará fermosas panorámicas nocturnas das dúas cidades iluminadas e do río Miño.
Está previsto que na andaina participen un centenar de persoas. A inscrición está aberta ata mañá mércores, 25 de xullo, ás 23.59 h na web www.andatui.es, cun prezo de 5€ por persoa.
Os participantes deberán estar ás 23 hora española no aparcamento do Monte Faro dende onde serán trasladados en dous autobuses até o aparcamento do Monte Aloia onde comezará a andaina. Aconséllase levar botas, roupa cómoda, bastón e lanterna. Haberá dous avituallamentos, un na vella Ponte Internacional de froita e bebida, e outro xa no remate no Monte Faro de rosca e chocolate. Na chegada serán sorteadas dúas comidas/ceas e dúas botellas de viño entre os participantes.
