As Ruínas de San Domingos poderán visitarse de martes a sábado en horario de 10 a 14 e de 17:30 a20:30 horas, e os domingos e festivos de 11 a 14 horas.
As Ruínas de San Domingos volveron abrirse esta mañá ao público, 3 anos de despois de producirse un desprendemento nun dos capiteis do edifico, incidente que obrigara ao seu peche. Con motivo desta reapertura, o deputado de Cultura e Lingua, Xosé Leal, acompañado polo director do Museo, Carlos Valle, realizou unha visita a este edificio que forma parte do conxunto do Museo de Pontevedra. Durante a visita, Leal manifestou a súa satisfacción por “recuperar un espazo histórico e tan simbólico e por volver a poñelo a disposición da cidadanía”. O deputado lembrou que as Ruínas son “un dos enclaves que máis lle gusta visitar á xente” e sinalou como exemplo as visitas dese mesmo momento –ás 12 da mañá no primeiro día de apertura- como expoñente de dito interese e da súa importancia a nivel cultural e turístico.
Pola súa banda, o director do Museo de Pontevedra, Carlos Valle, fixo un repaso polo proceso que implicou o peche das Ruínas de San Domingos e as obras posteriores. Afirmou que tras o desprendemento foi necesario ” primeiro realizar unha análise da situación do edificio, e despois acometer un tipo de obra cun tratamento técnico moi preciso”, así como unha serie de trámites que incluíron os informes da Comisión de Patrimonio e a posterior contratación da obra. As actuacións foron encamiñadas a asegurar a consolidación de todos os elementos do edificio, nomeadamente do rosetón, xa que durante a análise previa á obra se observara que non respondía aos estándares de seguridade necesarios.
O director do Museo aproveitou a súa intervención para lembrar que as Ruínas de San Domingos foron declaradas M0numento Nacional no ano 1895, sendo o primeiro monumento da provincia de Pontevedra en acadar esta declaración. Na historia do propio Museo tamén teñen un lugar destacado, posto que foron a sede da ‘Sociedad Arqueológica de Pontevedra’, que deu inicio ao actual Museo en 1927. Foron, ademais, o primeiro lugar no que se puido visitar a colección de miliarios antes de ser trasladada ao Edificio Sarmiento, tras ser rehabilitado a finais da década de 1970 e comezos de 1980.
Na actualidade, deste edifico, o máis antigo dos seis que conforman o Museo, consérvase unicamente a cabeceira, de cinco ábsidas -excepcional no gótico galego-, xunto con parte do muro sur da igrexa e a entrada ao capítulo do convento, fundado en torno a 1282, aínda que as obras do templo actualmente conservado non se iniciaron ata 1383, continuando ó longo do século XV.
Horario de visitas guiadas
Tanto Xosé Leal como Carlos Valle coincidiron en salientar a importancia de que este enclave histórico sexa de novo visitable, posto que tanto os grupos de turistas como todas as persoas que visitan a cidade de Pontevedra, veñen demostrando un gran interese en poder acceder a este edificio. Neste sentido, aseguraron que se espera que o número de visitantes que se achegan á cidade de Pontevedra, así como aos demais edificios visitables do Museo, se incremente notablemente grazas á reapertura das Ruínas.
As Ruínas de San Domingos poderán visitarse de martes a sábado en horario de 10 a 14 e de 17:30 a 20:30 horas, e os domingos e festivos de 11 a 14 horas. En canto ás visitas guiadas poderán realizarse todos os días de semana agás os luns, día de peche dos edificios do Museo de Pontevedra. De martes a sábado, estas visitas guiadas comezarán ás 10:30, ás 12:30, ás 17:45 e ás 19 horas. Os domingos e festivos serán ás 12:30 horas.
