A explanada do Multiusos acollerá o 12 de novembro a partir das 21.00 horas un magosto que se completará coa actuación do grupo confomado por Olaia e Sabela Maneiro e por Aida Tarrío.
O venres, a vila de Moraña recibirá a unha das formacións musicais da nosa terra que máis
está a despuntar nos últimos tempos. Tanxugueiras actuará o 12 de novembro a partir das
21.30 horas, na Explanada do Multiusos de Moraña.
Ata este enclave desprazouse o alcalde, José Cela, para presentar este concerto, que será
o peche de ouro do Magosto que organiza o Concello no mesmo lugar a partir das 21.00
horas e no que además de castañas, haberá chourizos e bebidas.
A actuación das Tanxugueiras forma parte do programa Musigal, da Deputación de
Pontevedra, grazas ao cal a vila morañesa acollerá a esta agrupación, conformada polas
voces de Olaia Maneiro, Aida Tarrío e Sabela Maneiro, pandereteiras que están a reformular
e a evolucionar as músicas de creación colectiva galega.
Autoras de éxitos como Figa ou Midas, veñen de colleitar premios como o de Mellor
adaptación de peza tradicional nos Premios La Opinión de Música de Raíz 2020 ou a
distinción do seu disco entre a selección dos 20 mellores que fai a World Charts Europe. O
seu videoclip de Perfidia tamén quedou finalista nos Premios Mestre Mateo do Audiovisual
Galego do 2019.
A entrada, tanto ao concerto como ao magosto, será libre, e desde o Concello pregan que
en todo momento se manteñan as medidas sanitarias correspondentes.
