A presidenta da Deputación de Pontevedra, acompañada do Presidente da Cámara Municipal de Viana do Castelo, José María Costa, inaugurou este sábado na cidade portuguesa, pola que pasa o Camiño Portugués pola Costa, a nova mostra da Asociación de Amigos do Camiño “Con pan e viño ándase o camiño”, na que reflíctese a cultura panadeira e vitivinícola vinculada as localidades polas que discorre a variante portuguesa do camiño de Santiago.
Á apertura da exposición tamén asistiron o deputado de Turismo, Santos Héctor Rodriguez, o Presidente da Asociación, Celestino Lores, e numerosas personalidades da cultura portuguesa.
Se o pasado ano, a exposición versou sobre a arte no Camiño, este ano recolle unha ampla selección da industria panadeira portuguesa e galega. Pódese observar pans e diversa bolería de Viana do Castelo, Ponte de Lima e Paredes de Coura, na parte portuguesa, e do Porriño, de Pontevedra, de Caldas de Reis ou de Ribadumia na parte galega. En canto aos viños, son os verdes e albariños das grandes adegas os que se atopan nesta ruta xacobea. Amais inclúe unha mostra pictórica e fotográfica coa temática do pan e do viño.
Carmela Silva destacou que “o Camiño Portugués é un instrumento fundamental para poñer en valor o noso territorio e o orgullo do que somos”
Na súa intervención na Cámara municipal de Viana, Carmela Silva desvelou “a miña felicidade por estar nunha cidade da que estou namorada hai moito tempo, e máis nun día como este no que celebrades o 170 aniversario”. A presidenta provincial aplaudiu unha mostra como esta “que permite poñer en valor o territorio porque o Camiño é un instrumento fundamental para unirnos aínda máis. Compartimos lingua, cultura e unha historia na que fomos capaces de derrubar pontes e fronteiras para ver que traballando xuntos recuperamos o mellor do noso pasado para mirar o futuro. O Camiño, dixo Silva, pon en valor o orgullo do que somos e temos que sentarnos para realizar máis accións de cara a un turismo de calidade, desestacionalizado que nos coñeza aínda mellor”.
Pola súa banda, o Presidente da Cámara de Viana, José Maria Costa, destacou que “co Camiño estamos nun proceso no que o Norte de Portugal e Galicia estamos realmente empeñados e que ten un enorme potencial cultural e turístico. Hoxe, dixo o Presidente da Cámara, é un dia especial, cumprimos 170 anos desde que temos o titulo de cidade e homenaxeamos a moitas persoas que teñen que ver co Camiño Portugués a Santiago porque por Viana pasan visitantes de ducias de nacionalidades”. Costa destacou que “o futuro é noso. Temos que profundar nunha relación transfronteiriza que poña en valor a nosa autenticidade. Somos moi parecidos porque cando falades de nós é como si falares da vosa terra, e cando falamos de vós é como si fora a nosa. E iso ten un valor incalculable“
A exposición “Con pan e Viño ándase o Camiño” xa pasou no mes de decembro pola Escola de Restauración de Pontevedra. Agora, durante un mes, estará na Cámara Municipal de Viana do Castelo para seguir despois o seu percorrido polo resto de vilas do camiño tanto na parte portuguesa como na provincia de Pontevedra.
