·Publicidade ·spot_img
InicioO MorrazoMarínO Concello de Marín anima a gozar do municipio a pé a...

O Concello de Marín anima a gozar do municipio a pé a través do turismo verde e seguro

O Concello de Marín anima a gozar do municipio a pé a través do turismo verde e seguroO municipio conta con cinco roteiros por distintos enclaves que poden realizarse cumprindo con todas as medidas. “O sendeirismo é unha forma moi boa de coñecer o noso municipio a pé, porque moitas veces temos sen descubrir espazos do noso propio lugar”, asegurou a concelleira de Turismo, Cristina Acuña.

As restricións sanitarias supuxeron para todos un cambio de chip e de plans á hora de gozar do noso tempo libre. Nestes momentos, debemos ser responsables e cumprir estritamente con todas as medidas impostas para frear o avance da pandemia. Pero iso non significa que non podamos gozar do noso tempo libre dun xeito seguro e sostible.

A concelleira de Turismo, Cristina Acuña, lembrou esta mañá que Marín ofrece “excelentes alternativas a nivel turístico, deportivo e de lecer que poden aproveitarse sempre, pero especialmente nestas circunstancias”. Seguindo esa filosofía, Acuña anima á veciñanza a gozar de Marín A Pé, lema da campaña pola que se lembran todas as rutas de sendeirismo habilitadas na vila, ás que se lle dará difusión durante estes días.

“Facer sendeirisimo é unha forma moi boa de coñecer o noso municipio, máis alá do casco urbano”, asegura a concelleira. “Moitas veces acontece que existen espazos e rincóns no noso propio lugar de residencia que nin coñecemos e coas rutas que temos habilitadas é sinxelo descubrilos”.

Acuña incide en que o positivo desta actividade é que pode facerse “con convivintes ou incluso en soidade, cumprindo co resto de medidas actualmente vixentes”. Así a todo, o que si refreou a pandemia foi a organización de andainas populares, “nas que xuntábamos moita xente e que agora son imposibles de realizar dada a situación”.

En total, son cinco os percorridos que poden facer aqueles amantes da natureza e da espectacular contorna do noso Concello:

1.- Ruta dos 5 Miradoiros: un traxecto que supón a descuberta dos grandes miradoiros do noso municipio, cambiando a perspectiva desde a que coñecer Marín. Ten unha dificultade media, unha lonxitude de 7 quilómetros e un tempo estimado de realización de 3 horas.

2.- Roteiro das Praias: toda a costa de Marín nunha única ruta, desde Portocelo até o Santo, con lugares únicos que son recoñecidos con distintivos ambientais como a Bandeira Azul. O nivel de dificultade é medio e supón unha ruta perfecta para realizar con toda a familia. A súa lonxitude é de 8 quilómetros e un tempo estimado de realización de 2 horas.

3.- Roteiro dos Montes e Praias: definida como a gran ruta de Marín, permite a aqueles que a fan descubrir todo o patrimonio escondido entre os montes da nosa vila: muíños, mámoas, menhires… A isto súmanselle unhas vistas únicas da ría desde as alturas. A dificultade é media-alta e supón algo máis de esforzo por parte do sendeirista.

4.- Roteiro do Monte Penizas: percorrido lineal ata o cumio do Monte Penizas, pasando polas trincheiras da Escola Naval e puidendo ampliar ata Santomé de Piñeiro.

5.- Roteiro de Subida ao Lago: o lago de Castiñeiras, un dos pulmóns verdes de Marín, agarda ao sendeirista ao final da ruta en ascensión polo río Lameira.

- Publicidade -spot_img

Publicidade



Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies