O Goberno de Carmela Silva reunirá no Auditorio Mar de Vigo aos concellos, a industria musical, as adegas e as empresas de todo o sector turístico da provincia
Camiños, Festivais, Enoturismo e Excelencia serán os eixos da campaña de promoción de Turismo Rías Baixas 2017 baixo o lema “Moito por descubrir”
O Auditorio Mar de Vigo acollera este xoves, 30 de marzo, as 20 horas, a gran Gala de presentación da Campaña de Turismo Rías Baixas 2017, na que a presidenta da Deputación de Pontevedra, Carmela Silva dará a coñecer as grandes liñas que marcarán este ano a promoción da provincia e na que a gran comarca de Vigo terá especial protagonismo.
Na Gala, na que haberá ademáis moita música, baile, humor e sorpresas, a presidenta reunirá aos alcaldes e alcaldesas da provincia, aos promotores da industria musical de Rías Baixas, aos representantes das principais adegas e a máis de duascentas empresas do sector turístico que este ano conseguiron o selo de calidade SICTED e que recibirán a acreditación no evento.
Baixo o lema de “Moito por descubrir” e coas “matrioskas” como imaxe de promoción, a ambiciosa campaña deste ano de Turismo Rías Baixas descansará en catro eixos fundamentais: os seis Camiños a Santiago que percorren a provincia de Pontevedra, especialmente no que se refire a comarca de Vigo, o Camiño Portugués e o Camiño pola Costa; os Festivais Rías Baixas con especial referencia a “Marisquiño”, “Sinsal” e “Vive Nigrán”; o Enoturismo, coas riquísimas zonas do Rosal e Condado ademáis do nomeamento de Cambados como Cidade Europea do Viño; e a Calidade con numerosas empresas do sur da provincia que xa obtiveron o distintivo SICTED.
