A fémia de lobo mariño achada por un mariñeiro no peirao da Guarda e bautizada como Guardesiña, recupérase na Coordinarora para o Estudo dos Mamíferos Mariños (CEMMA) en Nigrán.
O exemplar, unha femia de 85 cm de lonxitude e 14 kg de peso, foi localizada o pasado 14 de xaneiro no porto da Guarda (Pontevedra) con síntomas de desnutrición, deshidratación e afección respiratoria. Por este motivo, decidiuse o seu traslado inmediato á unidade de coidados intensivos que ten instalada a CEMMA en Nigrán por se fora necesario ingresar nun medio artificial controlado a un ou varios lobos mariños que necesiten rehabilitación.
O estado de Guardesiña no momento do ingreso era moi reservado, sendo diagnosticada e tratada polo equipo veterinario dunha afección pulmonar grave e desnutrición. A evolución nos días seguintes foi positiva, mellorando o seu estado xeral ao recuperar a temperatura corporal, diminuír a afección respiratoria e comezar a alimentarse por si mesma.
“Xa se alimenta de xarda tres veces ao día e pesa actualmente 15 kg, un máis de cando chegou”, explican dende o CEMMA, onde o obxectivo é, trala súa recuperación, devolvela ás costas de Irlanda na Primavera.
Nestes momentos, o animal mantén aínda un estado de saúde delicado pero está fóra de perigo. O máis importante agora é que recupere a súa capacidade de alimentarse por si mesmo. Este será o factor determinante á hora de tomar unha decisión sobre o seu retorno ao medio mariño, un proceso para o cal se adoita contar coa colaboración dos barcos arrastreiros para poder achegar a estes animais á súa área de procedencia.
Guardesiña recibiu onte a visita do alcalde de Nigrán, Juan González.“Ás veces só somos conscientes do que significa o CEMMA cando ocurren fitos como este, pero se trata dunha entidade de referencia que traballa arreo todo o ano polos animais mariños; para Nigrán é un orgullo que teñan aquí a súa sede. Dende o Concello aproveitamos esta ocasión para recoñecer o seu labor e agradecer o seu traballo”, sinala o alcalde, Juan González.
