Onte presentouse en Gondomar a III Milla Solidaria de Anemia Fanconi, que se celebrará o vindeiro 26 de marzo na vila.
O acto foi presidido polo alcalde de Gondomar, Paco Ferreira, quen estivo acompañado pola concelleira de Deportes Nuria Lameiro , o alcalde de Nigrán Juan González, a concelleira de Deportes de Baiona Mª Jesús Martins, Óscar Fernández Director técnico da Federación Galega de Atletismo, representantes da Asociación Española de Anemia Fanconi e representantes de ADROVI (Asociación de Doantes e Receptores de Órganos de Vigo).
Celebrarase o día 26 a partir das 10:30, na contorna das inmediacións do campo de Futbol das cercas cun total de 1069 metros que un ano máis tamén se fará en cadeira de rodas e con categorías diferenciadas e adaptadas.
A carreira solidaria chega este ano a Gondomar despois de celebrarse os anos anteriores en Nigrán e Baiona.
Como lembraron os asistentes resulta de fundamental importancia para enfermidades como a Anemia Fanconi que exista unha concienciación sobre a necesidade de doar médula. Por iso a Asociación poñerá a tarde do sábado 25 a disposición dos asistentes un espazo no que expliquen como leva a cabo esta doazón, ese mesmo día é o marcado para a recollida de dorsais (16-20h) no Centro Neural (Xefatura de Tráfico) de Gondomar.
Para poder participar na carreira é necesario apuntarse antes do día 22 deste mes, o importe íntegro será doado á Asociación Española de Anemia Fanconi. A inscrición poderase formalizar na páxina web Carreiras Galega, presencialmente na Piscina do Val Miñor en Ramallosa, en Deportes Athletics en Avda. Balaídos 41(Vigo) e en Bikila na Avda. de Castrelos 190 (Vigo).
No caso de que non se queira correr a carreira pero si facer o donativo a organización creou o Dorsal 0, desta maneira farase a achega de diñeiro para esta causa.
