O Concello de Nigrán manterá o festival ‘Solpor Monteferro’ como unha das citas de referencia na axenda estival do municipio ante a positiva resposta da xente nesta primeira edición.
O evento musical, nunha localización espectacular, con vistas do miradoiro de Monteferro á tardiña do pasado venres 21 e sábado 22, e coa música dalgúns dos mellores grupos locais, reuniu a preto de 2000 persoas nos dous días. Neste enclave único, un público de tódalas idades desfrutou dende ás 20.00 horas e de xeito gratuíto dos concertos de Blue Monk, Bliusvai, Dous, Moon Cresta e San Rockers, todos eles con fondas raíces en Nigrán.
Se no primeiro día se reuniron máis de medio millar de persoas, no segundo a cifra duplicouse ampliamente, todo elo sen que a presenza de xente nesta contorna supusese o máis mínimo desperfecto ou dano medioambiental e perfectamente organizado o aparcamento na zona (segundo datos facilitados polos organizadores).
