O programa, no que participarán preto de 19.000 persoas, ofrece alternativas de lecer dinámico e saudable á vez que fomenta a igualdade de oportunidades para os colectivos con diversidade funcional
“En ruta coa Depo”, programa da Deputación de Pontevedra xestionado a través do servizo de Cohesión Social e Xuventude, arrancou esta semana cunha participación de preto de 300 persoas pertencentes a asociacións dos concellos de Vigo, Poio e Mos. En concreto, beneficiáronse da primeira saída a Asociación de Mulleres Dorna (Vigo), a AA.VV. Cultural e Deportiva de Lourido (Poio), a Asociación de Amas de Casa Agarimo (Vigo) e a Asociación de Vecinos San Mamed de Torroso (Mos).
Na primeira saída de “En ruta coa Depo” a Asociación de Mulleres Dorna (Vigo) visitou Catoira e a súa contorna natural, Vilagarcía de Arousa e Cuntis; a Asociación Cultural e Deportiva de Lourido (Poio) viaxou ata a illa de San Simón e Redondela; a Asociación de Amas de Casa “Agarimo” (Vigo) percorreu O Grove e a Ría de Arousa e a Asociación de Vecinos San Mamed de Torroso (Mos) foi ata as Illas Cíes e percorreu o casco vello de Vigo e o barrio mariñeiro do Berbés.
“En ruta coa Depo” conta cun orzamento de 238.500 € e ten como finalidade mellorar a participación, a convivencia e a cohesión social dos distintos colectivos sociais da provincia de Pontevedra a través da promoción da igualdade de oportunidades para os colectivos con diversidade funcional, ofrecendo alternativas de ocio e tempo de lecer dinámico e saudable á poboación xuvenil da provincia así como o asociacionismo xuvenil e, ademais, promovendo rutas destinadas ás entidades de nais e pais que fomenten a convivencia e o intercambio de experiencias nas que participen activamente as nenas e nenos.
