Esta campaña a prol da compostaxe é o produto final dun proxecto educativo dos alumnos de 4º da ESO na materia de Ciencias aplicadas á actividade profesional, na que traballan todos os aspectos relacionados coa compostaxe, sempre coa idea de facer unha campaña na Vila de Gondomar para activar o uso das dúas composteiras comunitarias existentes no seu centro urbano.
Deseñouse un logo do que se fixo un imán, fixeron un tríptico explicando distintos aspectos da compostaxe, e distintos carteis e panfletos para repartir e pegar nos distintos locais de Gondomar. Toda esta información será exposta no congreso de compostaxe do Proxecto #Revitalízate da Deputación de Pontevedra que terá lugar na última semana de Maio.
