Este certame de pintura terá lugar nas illas Cíes, Ons, Sálvora e Cortegada, comezando a desenvolverse as actividades previstas a partir das 11 horas
A Xunta de Galicia, en colaboración co Parque Nacional das Illas Atlánticas de Galicia, organiza mañá o II Encontro de Pintores co fin de que os participantes reflictan nas súas creacións as paisaxes dos catro arquipélagos que forman o parque.
Este certame de pintura, que xa vai pola segunda edición, terá lugar nas illas Cíes, Ons, Sálvora e Cortegada, comezando a desenvolverse as actividades previstas a partir das 11 horas. A cada illa poderá asistir un grupo de 10 pintores cos seus respectivos acompañantes e un guía.
Os participantes pasarán a xornada pintando nestes enclaves naturais, facendo entrega das súas obras ás 18 horas. Posteriormente, os asistentes realizarán un coloquio para compartir experiencias e achegar suxestións sobre esta xuntanza. As pinturas, unha vez rematadas, quedarán a secar na illa na que se elaborara, nun lugar habilitado para iso.
O obxecto deste encontro é amosar, a través das pinturas, a riqueza natural, tanto en flora como en fauna, das illas que integran o Parque Nacional das Illas Atlánticas. Ademais, este tipo de actividades pretenden concienciar aos cidadáns da importancia de coidar e respectar o medio ambiente co fin de conservar axeitadamente contornas naturais como estes arquipélagos.
