20 pemes galegas inician con ViaExterior o seu camiño cara aos mercados internacionais

20 pemes galegas inician con ViaExterior o seu camiño cara aos mercados internacionais. Negocios dixitais e empresas con potencial de comercialización online dos sectores TIC, turismo e saúde e benestar caracterizan as empresas desta nova convocatoria da aceleradora de internacionalización de Zona Franca.

O Consorcio da Zona Franca de Vigo acolleu este venres a xornada de lanzamento da segunda edición da súa aceleradora para a internacionalización de pemes, ViaExterior. “Unha edición na que se mellorou o modelo e farase sobre un enfoque moito máis practico no que cada empresa recibirá tutorización personalizada enfocada ao seu sector e modelo de negocio” explicou David Regades ao dar a benvida ás 20 pemes seleccionadas e ao equipo docente e de titores. Tal e como explicou o Delegado, o programa de ViaExterior que empeza hoxe consistirá nunha primeira fase de seis meses de formación e tutorización ata chegar a un foro de investimento que se celebrará no mes de marzo onde as empresas poderán captar recursos financeiros para dar o salto a novos mercados. “Queremos que teñades éxito nos vosos plans de expansión para que dentro dun ano esteades a levar as vosas empresas e produtos polo mundo e deixando, alí onde cheguedes, o aceno da cidade de Vigo”.

As vinte empresas que participarán este ano pertencen sobre todo aos sectores TIC, turismo, saúde e benestar, que destacan por rexistrar altas taxas de crecemento de 2017 a 2018 e contan cun forte potencial de comercialización online ou están enfocadas no negocio dixital. Aínda que son empresas que xa teñen presencial internacional -moitas exportaron nalgunha ocasión ou que contan con algún cliente internacional- conseguir o “máis rápido, máis lonxe e mellor” foi a súa motivación para participar porque segundo manifestaron “buscamos asesoramento para abordar con maiores garantías a definición de estratexias de internacionalización” .

En ViaExterior, entre os meses de setembro e marzo, as pemes participantes elaborarán o seu plan de internacionalización, para o que contarán con 20 horas de formación especializada e co acompañamento dun titor que lles guiará no desenvolvemento da súa estratexia internacional.

O consultor do Banco Mundial, Mario Weitz, falou na primeira sesión sobre conxuntura económica mundial

No primeiro taller celebrado esta mesma tarde centrouse sobre a “Conxuntura Económica Mundial” e como debe incorporarse a un plan de internacionalización a análise da situación económica dos mercados destino. A sesión estivo impartida por Mario Weitz, prestixioso macroeconomista e consultor do Banco Mundial e da Comisión Europea e profesor de ESIC.

Anexo: listaxe de empresas seleccionadas na 2ª edición