Enmarcado na Cátedra ARDÁN, a Zona Franca de Vigo e a UVigo presentaron hoxe o informe ARDÁN Galicia 2024, unha referencia na análise da evolución do tecido empresarial, que ofrece ao ecosistema de empresas e institucións información útil para a toma de decisións.
O Delegado do Estado na Zona Franca, David Regades, lembrou que este documento “ten o propósito de contribuír á competitividade empresarial con instrumentos que xeren reflexión, diálogo e acción”, centrándose no volume de actividade do tecido de Galicia e no dinamismo por sectores e territorios, así como en factores como o rendemento e a produtividade, a capacidade innovadora, o acceso a mercados internacionais, a circularidade económica, a xestión do capital humano ou a incorporación do talento feminino nas compañías.
David Regades, acompañado dos catedráticos da UVigo Santiago Lago, Belén Fernández-Feijóo e Xosé H. Vázquez, detallou os datos globais do informe que revela que o conxunto das 41.886 sociedades analizadas alcanzaron en 2022 137.000 millóns de euros en ingresos de explotación, un 9,4% máis que no ano anterior, e xeraron 32.135 millóns de valor engadido bruto, que supuxo unha achega ao PIB de Galicia do 46%.
As empresas obtiveron uns beneficios globais de 1.175 millóns de euros e achegaron 235 millóns, vía impostos. Pola súa banda, a creación neta de postos de traballo foi dun 6,28%. Nunha comparativa sobre o emprego respecto a a situación antes da pandemia, por cada cinco postos de traballo de 2019 existe un novo actualmente. O documento tamén constata unha mellora das medias en actividade e eficiencia. O resultado neto de explotación creceu a un ritmo do 7,2% e o resultado do exercicio ao 6,3%. A rendibilidade económica e a rendibilidade financeira alcanzaron rexistros tamén superiores aos do ano anterior, situándose no 3,99% e o 7,6%. Tamén mellora a marxe de explotación, a rotación dos activos e a rotación das existencias.
Doutra banda, un total de 1.289 compañías galegas superan os restritivos criterios para obter algún dos 10 indicadores ARDÁN, o que representa o 3,5% do total analizado. A firma viguesa ROEIRASA é a única en Galicia que alcanza os 6 indicadores; outras seis asinas galegas logran entre 4 e 5 galardóns nesta edición.
O dinamismo da área de Vigo
O tecido empresarial implantado na comarca de Vigo supón o 20% das empresas analizadas, que contribuíron ao total de Galicia co 25% dos ingresos de explotación. O valor engadido bruto agregado para a área roldou os 4.200 millóns de euros, un 31% superior ao importe do exercicio precedente, alcanzando o 50% das empresas taxas de crecemento superiores ao 7,5%. Se se comparan estes resultados cos anteriores á pandemia, a capacidade para xerar valor engadido bruto situouse dez puntos por encima.
Vigo acapara o 27% da riqueza creada por ramas da industria manufactureira, a construción e enerxía, cuxas empresas demostraron un especial dinamismo, con crecementos medios do 22% no último ano. En canto aos sectores que destacaron en creación de valor engadido bruto están encadrados na automoción, loxística e transporte, industria farmacéutica, construción e servizos relacionados coa saúde.
Produtividade, igualdade de xénero e innovación
O Catedrático da UVigo Santiago Lago, destacou que ao abordar a posición comparada de Galicia respecto ao conxunto de España nalgúns dos factores determinantes da produtividade a escala agregada e por empresa, a comunidade galega non sae mal parada. A súa produtividade aparente do traballo e do capital mostran unha dinámica máis favorable que a media española, grazas para o efecto diferencial positivo do capital humano e da produtividade total dos factores; e a un maior aumento da cociente capital/traballo.
Pola súa banda, Belén Fernández-Feijóo, Catédrática da UVigo, sinalou que o número de respostas á enquisa sobre a igualdade de xénero no traballo aumentou máis do 25% respecto ao ano anterior o que evidencia que as empresas poñen de relevo ese factor como unha ferramenta fundamental na xestión da empresa. Con todo, a medida do desequilibrio na estrutura salarial, a súa monetización (custo de non igualdade) e a medida do grao de igualdade laboral, aínda non alcanzaron niveis aceptables.
Pola súa banda, o Catedrático Xosé H. Vázquez destacou que as empresas continúan demostrando o seu compromiso coa innovación, crucial para o seu crecemento e competitividade global. O documento constata que o 67% das empresas implementou melloras significativas nos seus procesos internos mellorando capacidade e flexibilidade na produción. Un 19% reportou cambios organizativos e obsérvase tamén unha mellora nas innovacións financeiras e modelos de negocio. O informe destaca que as empresas non só están a innovar en tecnoloxía, senón transformando as súas estruturas organizativas e procesos para adaptarse mellor ás esixencias do mercado global.
Internacionalización das empresas galegas
O pasado ano nas firmas galegas internacionalizadas, as vendas internacionais supuxeron un 15% sobre o total e as marxes de explotación das vendas internacionais foron do 8%. Estes parámetros tiveron un impacto positivo no beneficio antes de intereses e impostos, de forma que o 17% do montante das compañías foi xerado por vendas en mercados exteriores. A taxa de clientes localizados en mercados internacionais tamén rexistrou unha alza, pasando do 25,7 ao 26,4% e a media de vendas en liña en mercados internacionais que supoñía un 48,1% das vendas en 2022 chegou ao 50,5% en 2023.
