Inicio Galicia Presentación do proxecto ‘O Xacobeo 2021 e a Ruta da Seda’

Presentación do proxecto ‘O Xacobeo 2021 e a Ruta da Seda’

Presentación do proxecto ‘O Xacobeo 2021 e a Ruta da Seda’O director do Instituto Galego de Análise e Documentación Internacional (IGADI), Daniel González Palau, a sinóloga Marola Padín e a concelleira de Promoción da Cidade de Pontevedra, Anabel Gulías, presentaron onte o proxecto ‘O Xacobeo 2021 e a Ruta da Seda: Camiños para o diálogo Oriente-Occidente’ na Vicerreitoría do Campus de Pontevedra (Casa das Campás)

O concello pontevedrés é un dos consistorios galegos que apoia esta proposta, xurdida da convocatoria ‘O teu Xacobeo’ da Xunta de Galicia, un feito que Palau destacou sinalando a oportunidade que supón a investigación de cara a “promover o Camiño Portugués entre a poboación chinesa”. “O obxectivo é buscar puntos de encontro entre Oriente e Occidente que favorezan novas oportunidades turísticas, culturais,  económicas e académicas”, sinalou o director do IGADI.

“O Camiño Portugués é unha das rutas máis populares do Camiño de Santiago e a segunda en número de peregrinos (81.663 en 2018, contando os peregrinos do Camiño Portugués da Costa), despois do Camiño Francés (186.199),  o que supón unha vantaxe á hora de promover dito itinerario en China”, apuntou Palau.

Pola súa banda, Marola Padín destacou que en Galicia “temos moito que dar a coñecer nun país tan grande como China”, facendo referencia á riqueza cultural do territorio galego, ao Camiño de Santiago e ao Xacobeo 2021 como fonte de inspiración.

Por outro lado, a concelleira de Promoción da Cidade fixo referencia á súa propia área como ferramenta para dar a coñecer a Pontevedra no mundo con especial relevancia nos países asiáticos. “A nosa aportación abriu un marco global no eido local que está a traer moitos beneficios para a cidade”, declarou.

Anabel Gulías xustificou tamén o apoio a este proxecto “porque encaixa coa filosofía do Concello de Pontevedra sobre o que debe ser a Acción Exterior Galega e o papel referencial que deben ter as cidades no ámbito internacional e porque se trata de potenciar un dos maiores atractivos da cidade, o Camiño Portugués”.

Conferencia internacional

Marola Padín adiantou, ademais,  a data da conferencia na que se presentarán as conclusións do proxecto, o venres 17 de abril no Museo das Peregrinacións de Santiago de Compostela. Nestas xornadas prevese a participación de institucións galegas, chinesas e europeas para abordar as relacións Galicia – China.

Neste sentido, Palau adiantou que xa se realizaron diversas entrevistas a axentes galegos e chineses que están a arroxar luz sobre as conexións existentes entre o Camiño de Santiago e a Ruta da Seda. Amais desta información relevante, a investigación aspira a identificar unha rede galego-chinesa de natureza académica, sociocultural, turística e mesmo espiritual, para fortalecer as conexións co xigante asiático no horizonte do s. XXI.

Outro dos seus obxectivos é realizar unha revisión bibliográfica arredor do Camiño de Santiago e a Ruta da Seda que complemente a investigación de cara a identificar as fortalezas, debilidades, oportunidades e ameazas dos vínculos entre Galicia e China, e definir así un plan de actuación para situar o Xacobeo 2021 no país asiático.

De rutas e camiños

‘O Xacobeo 2021 e a Ruta da Seda: Camiños para o diálogo Oriente-Occidente’ está inspirada no artigo “De rutas e camiños no S.XXI” (2015), do fundador e Presidente de Honra do IGADI, Xulio Ríos, e ademais da do Concello de Pontevedra, conta coas achegas dos consistorios de A Coruña, Santiago e Lugo, así como coa colaboración de Casa Asia, entidade dependente do Ministerio de Relacións Exteriores do Estado.

Sobre o IGADI

O Instituto Galego de Análise e Documentación Internacional (IGADI) é un think tank independente que nace en 1991 cun dobre propósito: reflexionar sobre os problemas e tendencias da sociedade internacional contemporánea e pular por unha maior inserción de Galicia no mundo a todos os niveis.

- Publicidade -

ÚLTIMA REVISTA

+ VISTOS

ETIQUETAS

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies