A competición invernal de monotipos organizada polo Monte Real Club de Yates celebra este sábado a terceira das seis xornadas programadas
Os J80 galegos volven este sábado a Baiona para disputarse o terceiro asalto da liga de Inverno de J80, organizada polo Monte Real Club de Yates co patrocinio de Baitra. É a terceira xornada en programa (a segunda efectiva tras a anulación da primeira por falta de vento) e todo apunta a que a clasificación empezará a poñerse emocionante.
Nas tres probas celebradas ata o momento os favoritos empezaron a tomar posicións e as tres probas programadas para este sábado servirán para definir algo máis a clasificación, creando maiores distancias entre as tripulacións da parte alta e baixa da táboa ou axustando aínda máis os postos de cabeza.
Ademais, se o vento permite a celebración do programa ao completo (todo apunta a que si , porque a previsión anuncia ventos de compoñente norte duns 9 nós e picos de ata 14) e chégase á sexta manga, entrará en xogo un descarte, un movemento que permitirá aos equipos eliminar da clasificación o seu peor resultado.
Ata o momento, os tres veleiros que ocupan os postos de honra están separados por apenas dous puntos uns doutros. Son o Okofen de Javier de la Gándara (4 puntos), o Alboroto de Juan Carlos Ameneiro (6 puntos) e o Marías de Manel Cunha (8 puntos). En cuarta e quinta posición, algo máis distanciados, atopamos ao Cansino de Alejandra Suárez (15 puntos) e ao Spaco de Santiago Estévez (17 puntos).
