O Paseo de Bouzas e as Galerías do Castro, no concello de Vigo, foron galardoadas nos premios Gran de Area de Achega á Arquitectura 2023
Segundo destaca o fallo do xurado, do Paseo de Bouzas prémiase a rexeneración dunha fronte marítima deteriorada que recupera a esencia do lugar aplicando diferentes solucións estratéxicas, achegando enerxía e vida ao lugar, potenciando os valores naturais do litoral, a protección do patrimonio e a conexión directa e accesible dos veciños da cidade ao mar.
Das Galerías do Castro prémiase a singularidade da intervención, que transforma o angosto espazo dunhas galerías defensivas nun espectacular percorrido museístico sen apenas intervir sobre o existente.
