O Parque Nacional Marítimo Terrestre das Illas Atlánticas de Galicia vén de entrar no top 100 de destinos turísticos sustentables do mundo, tal e como anunciou esta semana o selo internacional Green Destinations.
Esta comunidade, da que forman parte varios organismos relacionados co turismo e o medio ambiente, celebrou esta mesma semana o evento Global Green Destinations Day en Liubliana (Eslovenia), onde se anunciou este recoñecemento para o Parque Nacional das Illas Atlánticas de Galicia.
Á hora de conceder esta distinción, os expertos valoraron criterios como a protección da natureza, a política turística do destino, a protección da paisaxe e a conservación do patrimonio cultural
Os destinos participantes foron avaliados por un grupo de expertos internacionais en turismo, sustentabilidade e medio ambiente, en base a un conxunto de 15 criterios, entre os que se atopan a protección da natureza, a política turística do destino, a protección da paisaxe e a conservación do patrimonio cultural.
Este recoñecemento é unha mostra dos esforzos por facer do Parque Nacional Marítimo Terrestre das Illas Atlánticas un referente do turismo responsable. Entre as iniciativas postas en marcha destaca o produto turístico “Starlight en espazos protexidos: o que a noite esconde”, un recoñecemento que se outorga a aqueles enclaves que gozan de excelentes calidades para a observación de estrelas, que están protexidos da contaminación luminosa e que contan coas instalacións axeitadas.
