Este fin de semana celébrase o Campionato Ibérico da Clase 2.4mR – Regata Vitaldent de Vela Adaptada, do IV Circuíto Iberdrola de Vela Paralímpica.
O Monte Real Club de Yates reúne esta fin de semana en Baiona á elite da vela paralímpica española no Campionato Ibérico da Clase 2.4mR – Regata Vitaldent de Vela Adaptada, unha competición incluída no IV Circuíto Iberdrola de Vela Paralímpica.
Entre os participantes estará Arturo Montes, representante español nos Xogos Paralímpicos de Río de Janeiro 2016. O deportista sevillano, que perdeu unha perna nun accidente tras ser arroiado por un barco mentres nadaba, é na actualidade uno dos máis destacados regatistas do panorama náutico peninsular.
Montes, do Real Club Marítimo e de Tenis de Punta Umbría, chega a Baiona ocupando o segundo posto do IV Circuíto Iberdrola por detrás de Rafa Andarias, outro dos grandes da Clase 2.4mR en España. Cunha discapacidade física que afecta os seus membros inferiores, o alacantino, do Club Náutico Jávea, pode presumir de lograr, aos seus 26 anos, cinco campionatos de España. O pasado mes de maio quedou, ademais, noveno no Campionato do Mundo celebrado en Holanda.
Outro dos deportistas destacados que competirán na Regata Vitaldent de Vela Adaptada do Monte Real é o murciano Antonio Maestre, do Real Club de Regatas de Cartaxena, que navega cunha parálise no seu brazo esquerdo. Tamén estará este fin de semana en Baiona o andaluz Borja Melgarejo, compañeiro de Arturo Montes no Real Club Marítimo e de Tenis de Punta Umbría e no equipo olímpico de Río 2016.
O Campionato Ibérico da Clase 2.4mR que o Monte Real Club de Yates organiza por delegación da Real Federación Española de Vela e coa colaboración das Federacións de Vela Galega e Portuguesa comeza este venres cunha serie de regatas de adestramento nas que os deportistas, chegados de diferentes puntos de España e Portugal, poderán tomar un primeiro contacto coas augas da baía de Baiona.
No Atlántico, a diferenza do Mediterráneo, a ondada e as mareas adquiren un protagonismo moi especial e resultan moitas veces determinantes para a execución das probas. De aí a importancia da xornada de adestramento que se realiza previa ao comezo do campionato, para que os regatistas poidan afacerse ao campo de regatas.
Tras as regatas iniciais de hoxe, unha reunión de patróns e unha cea de confraternidade, a competición propiamente dita empezará mañá sábado ao mediodía coas primeiras mangas puntuables, e finalizará o domingo coas últimas probas e a entrega de premios, que se celebrará ás cinco da tarde nas instalacións do club baionés.
No Campionato Ibérico que se disputa este fin de semana, os participantes navegan nun barco individual de 4,20 metros de eslora, no que o regatista vai sentado, quedando a súa cabeza a escasos centímetros da auga. A clase 2.4mR é unha modalidade paraolímpica desde os Xogos Olímpicos celebrados no ano 2000 en Sydney.
