O Museo de Arte Contemporáneo de Vigo (MARCO), celebra unha data tan especial con obradoiros para público infantil e adulto, que se escalonarán durante catro días consecutivos, do 18 ao 21 de maio, xunto a visitas guiadas á exposición 4 PROXECTOS e actividades do Club de Lectura.
As actividades xirarán ao redor da exposición “4 PROXECTOS. Mónica Alonso, Rosendo Cid, Salvador e Juan Cidrás, Mar Vicente”, recentemente inaugurada nas salas da planta baixa. O diálogo cos distintos espazos, que está na base deste proxecto expositivo, será o eixe condutor dos percorridos e talleres sobre a obra de cada artista.
En liña co lema do ICOM para esta edición, trátase de crear, imaxinar e compartir propostas contemporáneas partindo, neste caso, dun patrimonio arquitectónico como é o propio edificio do MARCO e os espazos que o conforman.
O DÍA INTERNACIONAL DOS MUSEOS 2021
O Consello Internacional de Museos (ICOM) creou o Día Internacional dos Museos en 1977 para sensibilizar o público sobre o papel dos museos no desenvolvemento da sociedade. Dende entón, cada 18 de maio miles de museos de países e territorios en todo o mundo celebran este día en torno ao tema elixido polo ICOM para cada edición —incluído o pasado 2020, cun altísimo índice de participación a pesar das limitacións impostas por un formato exclusivamente dixital.
A crise da Covid-19, propagada polo mundo enteiro, tivo graves repercusións no sector cultural a curto e longo prazo. Non obstante, tamén serviu de catalizador para innovacións cruciais que xa estaban en marcha. En particular, un maior enfoque cara á dixitalización e a creación de novas formas de experiencia e difusión, e o reforzo do potencial creativo da cultura como motor de recuperación e innovación na era post-Covid.
Co tema “O futuro dos museos: Recuperar e reimaxinar”, o Día Internacional dos Museos 2021 invita aos museos, aos seus profesionais e ás comunidades a crear, imaxinar e compartir novas prácticas de (co)creación de valor, novos modelos de negocio para as institucións culturais, e solucións innovadoras para os retos sociais, económicos e ambientais do presente.
ACTIVIDADES
“O futuro dos museos: Recuperar e reimaxinar”
CALENDARIO E HORARIOS:
- Martes 18, mércores 19, xoves 20
Actividades e obradoiros para público infantil, en torno á exposición “4 PROXECTOS”
Destinatarios: público infantil a partir de 3 anos
Horarios:
De 17.00 a 18.30 participantes de 3 a 6 anos
De 19.00 a 20.30 participantes de 6 a 12 anos
- Venres 21 maio
Obradoiro para público adulto, en torno á exposición “4 Proxectos”
Destinatarios: público adulto en xeral (reserva preferente membros AAM Agrupación Amiga do MARCO)
Horario: ás 18.00
- Martes 18, mércores 19, xoves 20, venres 21 maio
Visitas á exposición “4 Proxectos” guiadas por monitores MARCO
Destinatarios: público en xeral
Horario: ás 12.00
- Venres 21 de maio
Visitas á exposición “4 Proxectos” guiadas por artistas participantes
Destinatarios: actividade exclusiva para membros AAM Agrupación Amiga do MARCO
Horarios:
Ás 17.00: visita con Rosendo Cid. “Todo aquilo que acontece e con todo non é”
Ás 19.00: visita con Mónica Alonso. “A maxia do colibrí. Seis casos desesperados”
- Mércores 19, venres 21 maio
Sesións Club Lectura
Destinatarios: participantes Club Lectura #BiblioMARCO
Horarios:
Mércores ás19.00 = Grupo virtual por Zoom
- Mark Oliver Everett. Cosas que los nietos deberían saber
Venres ás 19.00 = Grupo presencial
- Julian Barnes. O ruido do tempo
INSCRICIÓN ACTIVIDADES:
A partir do venres 14 de maio en Taquilla MARCO
Tel. 986 113900 (extensión 100)
Horario taquilla: de martes a venres de 11.00 a 14.30 e de 17.00 a 21.00 (domingos de 11.00 a 14.30)
