Centos de persoas participaron este domingo, 16 de maio, nunha marcha en defensa da Groba e contra o Modelo Enerxético plantexado que pretende instalar 44 aeroxeradores repartidos en seis Parques Eólicos por toda a Serra.
Cun percorrido duns seis quilómetros, a saída tivo lugar ás 11 da mañá dende o Alto da Mata con chegada ao Alto da Groba e O Montouto e posterior regreso ao punto de partida. Foi organizada pola asociación SOS Serra da Groba e o Instituto de Estudos Miñoráns e co apoio de máis de 60 colectivos.
Ao final do percorrido, alcaldes e alcaldesas da comarca foron convidados para a lectura dun manifesto.
Oposición á instalación dos parques eólicos
A instalación masiva de parques eólicos por toda Galicia está a levantar moita oposición social e o Val de Miñor non é unha excepción
Nos últimos meses, as grandes empresas do sector eólico retomaron a tramitación e desenvolvemento das infraestruturas eólicas impulsadas pola Xunta de Galicia. Na Serra da Groba está prevista a instalación de 44 aeroxeradores e na do Galiñeiro 13.
