A rondalla Pontellas do Porriño gaña o VI Concurso de Rondallas da Deputación de Pontevedra, que tivo lugar no Instituto Feiral de Vigo, ante máis de 10.000 espectadores
A edición deste ano reuniu no Ifevi un total de dez rondallas, con máis de 1.400 membros cunha media de idade inferior ós 28 anos
A rondalla porriñesa de Pontellas fíxose a pasada noite co primeiro premio do VI Concurso Provincial de Rondallas, organizado pola Deputación de Pontevedra, ante as máis de 10.000 persoas que abarrotaron o Instituto Feiral de Vigo.
Este grupo, un dos que espertou maiores ovacións na tarde, recibiu un premio de 2.100 euros, que foi entregado polo presidente da Deputación, Rafael Louzán; o vicepresidente José Manuel Figueroa e a deputada provincial Marta Iglesias, que acudiron acompañados da alcaldesa de Mos, Nidia Arévalo, e doutros alcaldes da comarca como Nelson Santos, do Porriño, ou Fernando Guitián, de Gondomar.
O segundo premio conseguiuno nesta ocasión a rondalla de Santa Eulalia de Mos, cunha dotación económica de 1.800 euros. En terceira posición quedou a rondalla Helios de Bembrive, vencedora da última edición e que nesta ocasión recibiu un premio de 1.500 euros.
A rondalla da Asociación de Veciños Galiñeiro de Vincios (Gondomar) gañou o primeiro premio de abandeirados, dotado cun recoñecemento de 400 euros. En segunda posición quedou a tonadilla de Valadares e o terceiro posto foi para Santa Eulalia de Atios (O Porriño).
O resto de rondallas recibiu un premio de 1.300 euros cada unha en recoñecemento da súa participación.
Tanto Rafael Louzán coma José Manuel Figueroa agradeceron a masiva presenza de público nesta sexta edición do tradicional concurso de rondallas da Deputación, así como a profesionalidade e entrega mostrada por todas as agrupacións participantes.
O concurso de Rondallas da Deputación contou este ano cunha participación de dez grupos, que entre preparadores e concursantes sumaron máis de 1.400 participantes, cunha media de idade inferior ós 28 anos. Catro das rondallas estaban compostas por máis dun centenar de membros.
As rondallas integrantes deste VI Concurso foron a do Centro Social, Cultural e Recreativo de Beade, con 94 compoñentes; a rondalla do Centro Social, Cultural, Recreativo e Deportivo Helios de Bembrive, con 95 compoñentes; a rondalla da Asociación Cultural e Social Herville-Mos, con 61 compoñentes; a rondalla da Asociación de Veciños Galiñeiro de Vincios (Gondomar), con 140 compoñentes; a rondalla do Círculo Recreativo, Cultural e Deportivo Santa Eulalia de Mos, con 114 compoñentes; a rondalla Pena Freixo de Vigo, con 90 compoñentes; a rondalla da Asociación de Veciños de Zamáns, con 45 compoñentes; a rondalla da Asociación de Veciños do Centro Cultural e Veciñal de Valladares, con 90 compoñentes; a rondalla da Asociación Cultural e Musical de Pontellas, con 115 compoñentes; e a rondalla da Asociación Recreativa Santa Eulalia de Atios, con 118 compoñentes.
A gran afluencia de público chegado de distintos municipios da provincia propiciou unha máxima tensión entre os rondallistas, que este ano presentaron coreografías moi traballadas e ensaiadas con intensidade durante os últimos meses.
Os campións do mundo de baile, o grupo Media Punta, de Bouzas, amenizaron a xornada como artistas convidados durante a deliberación do xurado. O grupo arrincou os aplausos dun público que aguantou, entre aclamacións e ovacións, preto de tres horas de concurso.
O xurado estivo formado pola deputada Marta Iglesias, en nome do presidente da Deputación; o director da Banda Unión Musical de Coruxo e profesor do Conservatorio de Ponteareas, Francisco Abal; o director da Escola de Gaitas da Deputación, Hipólito Cabezas; o mestre de gaitas e percusión da Escola da Deputación,Roberto Porto Graña; Camilo Pais Martínez, en representación da Federación Recreativa de Peñas El Olivo; e Abraham Fernández, director da Banda de Gaitas Xarabal, en representación da Unión de Centros Culturais. O secretario do xurado foi Julio Vázquez Martínez, xefe de servizo da Deputación en Vigo.
