O intelectual premiado cun Goya en 2002, impulsa desde a sede lisboeta do Cervantes un proxecto para divulgar o Camiño Portugués pola costa
Javier Rioyo -xornalista, guionista, escritor e actualmente director do Instituto Cervantes de Lisboa- poñerá este sábado co seu documental “Estranxeiros de si mesmos” o broche de ouro ao mes dedicado polo Concello de Nigrán á conmemoración do 80 aniversario da Guerra Civil.
O intelectual estará presente no Auditorio Municipal (Praza do Concello) para a proxección ás 20.00 horas e posterior faladoiro sobre este traballo que dirixiu xunto a José Luis López Linares e que lles valeu o Goya á ‘Mellor Película Documental’ no ano 2002.
“Estranxeiros de si mesmos” é unha investigación sobre os mozos que viñeron a España para loitar na guerra civil e sobre os españois que, á súa vez, marcháronse fóra para integrar a División Azul. O documental recolle os testemuños de antigos combatentes, agora xa anciáns, que loitaron en diferentes bandos: os italianos que viñeron a España a apoiar aos sublevados, os estranxeiros que se alistaron ás Brigadas Internacionais e os españois integrantes da División Azul que se foron a Rusia a combater o comunismo. Sen entrar en valoracións políticas, “Estranxeiros de si mesmos” reflicte os diferentes sentimentos que lles impulsaron a presentarse voluntarios e coller as armas arriscando a súa vida por uns ideais.
A Javier Rioyo (Madrid, 1952) o cinema español débelle varias das películas documentais máis relevantes do últimos vinte anos, caso desta que presenta agora en Nigrán ou ‘Asaltar os ceos’ ou ‘Á mantenta de Buñuel’. Escritor, columnista e colaborador en diferentes medios, presentou programas de libros en radio e televisión (obtivo o Premio Fomento á Lectura 2005) e escrito sobre a memoria Madrid (a súa cidade natal). Antes de dirixir o Instituto Cervantes de Lisboa (cargo que asumiu en 2014) estivo á fronte do de Nova York.
Rioyo, quen veranea en Aldán desde hai 20 anos, promove desde a sede lisboeta diferentes traballos destinados a divulgar o camiño portugués pola costa.
