Inicio Pontevedra Gala de clausura da VIII edición do Festival Primavera de Cine

Gala de clausura da VIII edición do Festival Primavera de Cine

Gala de clausura da VIII edición do Festival Primavera de CineLa felicidad de los perros, de David Hernández e Chuva é cantoria na aldeia dos mortos, de João Salaviza e Renée Nader Messora gañan o premio do público a mellor longa galega e lusófona respectivamente

Despois de cinco días cheos das mellores obras galegas e lusófonas, diferentes actividades paralelas de gran éxito, como o Cine nos Barrios, coa proxección en Navia, o Casco Vello Alto e o Calvario de varias obras lusófonas, Viva Cuba, unha retrospectiva de cinema cubano ou Cine Miúdo, o Primavera do Cine despedirá a súa oitava edición cunha gala de clausura repleta de humor, música e cinema lusófono e moitas emocións.

A gala final comezou ás 19.00 no Auditorio do Concello cunha interpretación musical de Senza, unha banda portuguesa de Aveiro formada por Catarina Duarte e Nuno Caldeira que inspira as súas melodías nas viaxes que fan ao redor do mundo, para deixar paso a actriz galega Bea Campos, quen presentou a velada e puxo o toque de humor.

Antes de entregar os primeiros galardóns, feitos polo artista Íñigo Almeida, a presentadora e actriz fixo un pequeno resumo do que deu de si a oitava edición do Primavera do Cine, que este ano proxectou máis de 75 pezas audiovisuais de Galicia e dos países lusófonos. Así, Bea Campos lembrou tamén a gran calidade das obras que se puideron ver no certame, premiadas e seleccionadas nos mellores festivais do mundo.

A presentadora tampouco se esqueceu do resto das actos que se levaron a cabo no festival, dende Cine Miúdo, evento ao que acudiron máis de 800 nenos, ata Cine nos Barrios pasando pola charla de interpretación de Morris, ou o fin de festa grazas ao concerto de Basanta e a Festa dos Videoclips.

Por suposto, tamén houbo un oco para lembrar a gran estrea de La felicidad de los perros, de David Hernández en Vigo, a súa cidade natal, e o éxito absoluto de La pasión de Juana de Arco no Conservatorio Superior de Música, un evento cheo de emoción no que nin os músicos nin o público puideron conter as bágoas. Así mesmo, recordou que todos estes actos e proxeccións traducíronse nun incremento da reputación e do recoñecemento do festival e que serviron para afianzar as alianzas cos diferentes axentes culturais de Vigo, Galicia, Portugal e Brasil.

Os primeiros galardóns en darse a coñecer e feitos polo artista Íñigo Almeida chegaron quince minutos despois de dar comezo o evento e foron o Premio Primavera do Cine á mellor curta lusófona, outorgado a Alison Zago por Narrativas de um crime, un filme que se centra na vida de dous policías de caracteres moi diferentes que teñen que traballar xuntos nunha escena dun crime e o Premio CREA á mellor curta galega onde Fran X. Rodríguez e a súa curta Beautiful Boy, unha historia sobre o consumismo, conseguiron alzarse co galardón.

Despois dunha pequena actuación de Senza, tocoulle o turno ao Premio Primavera do Cine ao mellor videoclip, que conseguiu o grupo musical Mileth, grazas a Bruma e salitre, feito por Xaime Miranda. Uns minutos despois daríase a coñecer o Premio Primavera do Cine ao mellor traballo de animación por parte do público.

Así, as gañadoras son Mónica Santos e Alice Guimarães por Entre sombras, unha cinta ambientada na cidade de O Porto e feita en imaxe real, pero rodada en stop motion. Nela nárrase a aventura de Natalia, unha muller atrapada nun traballo monótono, e a súa procura por atopa un corazón roubado. Ademais, nun mundo onde os corazóns poden depositarse nos bancos, tamén terá que decidir se deixa o seu nun deles ou pola contra, opta por gardalo para si mesma

Xa no ecuador da gala de clausura desta oitava edición do Primavera do Cine e como conmemoración da irmandade Galego-Lusófona no Día da Lingua Portuguesa os asistentes gozaron dunha pequena interpretación teatral do grupo de teatro Amador do Instituto Camões que serviría coma introdución ao que viría a continuación: a proxección da curta O meu poeta, de Hugo Portela Larisch, que afonda no sentimento de saudade a través da música, a poesía e as lembranzas familiares.

Xa a piques de rematar a noite, o xurado profesional composto polo guionista e cineasta Alexandre Cancelo, a actriz e docente de interpretación Lola Correa, o crítico, programador e profesor de guión da Universidade de Vigo José Manuel López e Anabel G. Penín, quen formou parte da directiva do Cineclube Lumière e foi responsable da Unidade de Igualdade da Universidade de Vigo durante oito anos outorgaron os premios á mellor longa lusófona e á mellor longa galega, así coma unha mención especial no apartado de longas lusófonas.

Deste xeito, Lola Correa e José Manuel López subiron ao escenario e déronlle o Premio do Xurado Primavera do Cine á mellor longa lusófona a Alva, de Ico Costa, filme que que conta a historia dun crime e de como o seu protagonista decide agocharse nun bosque, por “transmitir sen concesións a complexidade do comportamento humano. Pola súa capacidade para narrar subvertindo as formas clásicas do relato cinematográfico. Alva é unha aposta polos límites da expresión artística que xoga con mestría co son e a contención dramática para crear unha experiencia artística única e reveladora”.

Ademais, tamén se entrega unha Mención Especial do Xurado a Deslembro, de Flávia F. Castro “pola súa capacidade para amosar os espazos interiores dunha familia e a súa sensibilidade exquisita para retratar o paso á madurez e a memoria persoal e colectiva”.

Doutra banda, o Premio do Xurado Primavera do Cine á mellor longa galega foi outorgado por Anabel G. Penín e Alexandre Cancelo a La felicidad de los perros, de David Hernández pola “súa forza expresiva, o seu manexo do tempo e a calidade da súa aposta dramática. Por facer do cinema unha experiencia colectiva e a súa capacidade para aunar talentos nun proxecto honesto de grande ambición artística. La felicidad de los perros encarna os valores de compromiso social, ético e estético que defende o festival Primavera do Cine”.

O tan ansiado Premio do Público Primavera do Cine á mellor longa lusa foi para Chuva é cantoria na aldeia dos mortos, de João Salaviza e Renée Nader Messora, un filme que explora a vida dun mozo, Ihjãc, pertencente a unha tribo indíxena do norte do Brasil e de como escapa a cidade para fuxir do seu destino de converterse en chamán.

Xa o Premio do Público Primavera do Cine á mellor longa galega recaeu en La felicidad de los perros, de David Hernández, facendo así dobrete nesta oitava edición do Primavera do Cine. Trátase dun filme que narra a vida de César, home casado de 40 anos e con unha filla que se queda sen traballo. A cinta ten como transfondo a crise económica e relata o complicado que é ter proxectos de vida e que, sen dúbida, cautivou tanto o público coma o xurado profesional.

Finalmente, o director do festival, Juan de Castro pechou a gala cun discurso final. Nel quixo destacar que a oitava edición do Primavera do Cine “foi unha edición marabillosa no que os filmes da sección oficial gustaron moitísimo” e continuou dicindo que, pese as carencias “nunca tan pouco e con tan pouco fixeron un gran programa coma o deste ano”

Juan de Castro recordou tamén que grazas a esta edición “fortalécéronse as alianzas con múltiples entidades galegas e estranxeiras” e que este foi, sen dúbida “o mellor festival de cine que tivo a cidade”.

- Publicidade -

ÚLTIMA REVISTA

+ VISTOS

SÍGUENOS

694FansGóstame
291SeguidoresSeguir

ETIQUETAS

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies