O presidente da Xunta, Alberto Núñez Feijóo, referiuse hoxe ao emprendedor galego como un dos grandes artífices da nova Galicia que se atreve a investir, a arriscar, a diversificar e a acertar. “Cada iniciativa que se culmina é unha mensaxe que lle di á sociedade que somos un pobo gañador. E mesmo as iniciativas que non frutifican transmiten a idea fundamental de que sempre hai que intentalo, superando ese nefasto medo ao fracaso que é a mellor forma de non ter nunca éxito”, aseverou.
Afirma que a baixada do paro en máis de 7.780 persoas no pasado mes de maio, “fainos pensar que os emprendedores están recuperando a confianza e están volvendo contribuír a crear postos de traballo, que é o que todos desexamos”
Durante o almorzo informativo organizado por Nueva Economía Fórum, onde presentou o presidente da Confederación de Empresarios de Galicia, José Manuel Fernández Alvariño, Feijóo afirmou que a confianza empresarial é un índice inequívoco da confianza na propia Comunidade porque os proxectos empresariais non son momentáneos, fugaces ou efémeros, senón que teñen ambiciosos horizontes temporais. E, neste sentido, asegurou que “esa é a razón pola que os datos do paro que se coñeceron onte nos alentan cara ao futuro”.
Asegura que a confianza empresarial é un índice inequívoco da confianza na propia Comunidade porque os proxectos empresariais non son momentáneos, fugaces ou efémeros, senón que teñen ambiciosos horizontes temporais
“A baixada do paro en máis de 7.780 persoas no pasado mes de maio, especialmente nesta provincia de Pontevedra, o descenso en todos os sectores de actividade económica –incluído o colectivo de persoas sen emprego anterior- fainos pensar que os emprendedores están recuperando a confianza e están volvendo contribuír a crear postos de traballo, que é o que todos desexamos”, incidiu, logo de precisar que “hoxe podemos dicir por primeira vez que Galicia ten menos paro que hai catro anos”.
Sostén que a política ten o deber de proporcionar ao mesmo tempo esperanza e solucións; e salienta que se se acerta con esa combinación, “as encrucilladas que afrontan Europa, España e Galicia, poderán superarse sen trastornos para o sistema democrático e o benestar”
Ao longo da súa intervención, o responsable autonómico referiuse a José Manuel Fernández Alvariño como unha confirmación do vigor empresarial que empeza a rexurdir en Galicia. “A Confederación de Empresarios de Pontevedra, a Cámara de Comercio de Vigo, a Asociación de Tallares da provincia de Pontevedra, a Asociación de Empresarios da Automoción, Faconauto, o Club Financeiro de Vigo, a propia CEOE e, por suposto, a Confederación de Empresarios de Galicia, teñen a súa impronta”, dixo, ao que engadiu que Alvariño é desa clase de persoas que posúen a virtude de catalizar proxectos colectivos.
Así mesmo, aseverou que na figura do presidente dos empresarios galegos dáse un compendio de idealismo e realismo que explica a súa traxectoria. “Na base de todas as grandes aventuras empresariais danse aspectos visionarios, intuicións xeniais e unha capacidade de anticipación que non está ao alcance de calquera. Mentres que o teórico se queda nesa fase, o gran emprendedor adapta a intuición ás condicións reais”, afirmou.
Nesta mesma liña, subliñou que a misión do político actual non é moi diferente: “A política ten o deber de proporcionar ao mesmo tempo esperanza e solucións. Combinar as dúas virtudes é a mellor receita para tratar as doenzas da sociedade moderna. Se acertamos con esa combinación, as encrucilladas que afrontan Europa, España e Galicia, poderán superarse sen trastornos para o sistema democrático e o benestar”, concluíu.
