As melloras consistiron na colocación de mesas interpretativas e de sinalización do sendeiro. As obras foron acometidas mediante un convenio de colaboración entre o Concello de Bueu e a Deputación de Pontevedra, que ascendeu a case 11.000 euros
O Sendeiro Azul de Cabo Udra, un dos maiores atractivos turísticos e naturais do Concello de Bueu, xa dispón dunha nova sinalización e de certas melloras no mantemento, unhas obras coas que se dá resposta ao incremento do número de visitas que se producen ano a ano.
A actuación, financiada mediante un convenio subscrito coa Deputación de Pontevedra, e levadas a cabo pola empresa Ecoplanin Xestión e Información Ambiental S.L., consistiu no deseño, fabricación e colocación de mesas interpretativas en madeira tratada en diversas zonas. Tal é o caso de Chan de Esqueiros, que na actualidade supón o punto máis común de entrada ao Sendeiro Azul, no que se destacaron os distintos valores e elementos patrimoniais que o integran, ademais dunha imaxe e descrición de cada un deles.
Outra das mesas incluíuse nun dos miradoiros naturais nos que se ofrece unha interpretación das augas protexidas circundantes a Cabo Udra e a relación íntima dos valores naturais cos do Parque Nacional das Illas Atlánticas de Galicia. No conxunto do patrimonio histórico – militar situouse unha mesa interpretativa na que se salienta este patrimonio, que abrangue desde a batería costeira de artillaría alí instalada durante a Guerra Civil española, e que conforma un dos escasos lugares desta índole que se conservan na costa galega. Por último, a última das mesas ofrece a interpretación da paisaxe predominante na senda constituída por una matogueira atlántica con elementos termófilos e rica en elementos singulares de fauna, como una interesante poboación costeira de Timon lepidus e Caprimulgus europaeus.
Con esta sinalización e mellora nos paneis interpretativos, a concellaría de turismo, dirixida pola nacionalista Silvia Carballo, busca cumprir un primeiro servizo de recepción e información aos visitantes que accedan ao espazo desde a senda, ao tempo que contribúe á ordenación espacial do medio protexido.
O orzamento ascendeu a case 11.000 euros, dos que a Deputación de Pontevedra achegou o 80% e o Concello de Bueu un 20%, segundo un convenio asinado en decembro do pasado ano. Neste sentido, o ente provincial busca garantir as óptimas condicións dos Sendeiros Azuis do conxunto de Pontevedra, territorio no que existen o maior número de galardóns azuis.
