O alcalde de Baiona, Ángel Rodal, arroupado pola concelleira de Turismo, Beatriz González, e a directora Xeral de Turismo de Galicia, Nava Castro, presentou ao público asistente ao acto a importante efeméride que se celebrará na Real Vila durante o ano 2018: o 525 aniversario da chegada da Carabela Pinta a este porto. O Concello está a traballar nunha programación de actividades que, durante 6 meses, promocionará este feito que pon en valor a importancia histórica da Vila: desde ciclos de conferencias, música, actividades náuticas, etc. E que terá como prato forte a celebración da 23ª edición da Festa que será os días 2,3 e 4 de Marzo deste ano.
Durante a presentación, que contou con gran afluencia de público asistente, proxectouse o vídeo promocional que será o eixo central da promoción desta edición da festa, declarada de Interese Turístico Internacional.
Entre os asistentes, ademais dos xa mencionados, atopábase o Delegado de Xunta en Vigo, Ignacio López-Chaves, o Deputado Provincial de Turismo, Santos Héctor, o presidente de Aceba, Marcos Comesaña, o director do Parador de Baiona, Francisco Plaza, representantes das Vilas Mariñeiras, así como diversos restauradores e hostaleiros de Baiona. Tamén estiveron visitantes ilustres da Vila fincados en Madrid, como a actriz María Castro, o compositor Xullo Mengod, que teñen a súa segunda residencia en Baiona e o fillo do historiador e xurista xa falecido, Vicente Sierra Ponce de León, entre outros.
Durante os cinco días de duración da feira, a oferta turística de Baiona estará presente na caseta de Galicia, a través do material promocional facilitado polo Departamento de Turismo. Tanto o Alcalde como a Concelleira puideron apreciar, durante a súa estancia alí, o gran interese que esperta Baiona na capital de España.
