Baiona garda un minuto de silencio con motivo do Día Internacional para eliminar a violencia contra as mulleres e fai un lazo humano con globos brancos e flores en memoria das vítimas
Numerosos veciños de Baiona acudiron ao minuto de silencio convocado pola concellería de Igualdade do Concello de Baiona, á fronte de Mª Carmen Paredes Cabral, con motivo do Día Internacional para eliminar a violencia contra as mulleres. A praza do Concello acolleu o acto no que a Concelleira leu o manifesto en contra da violencia de xénero aprobado o pasado día 3 de novembro no pleno.
Durante o acto Paredes foi lendo cada un dos 40 nomes, idade e procedencia, das vítimas da violencia de xénero no noso país, á vez que daba lectura a concelleira a directora do CIM ía entregando a cada veciño ou veciña unha flor ou un globo branco por cada vítima. O obxectivo final foi realizar un lazo branco humano para mostrar así o rexeitamento da sociedade baionesa á violencia de xénero.
O acto terminou cando se soltaron ao aire os corenta globos brancos en memoria das vítimas.
