Este sábado 8 de outubro arrancou a primeira das catro etapas do camiño entre Santiago e Fisterra organizadas conxuntamente pola Cámara Municipal de Caminha e o Concello da Guarda no marco da candidatura do esteiro do Miño a Paisaxe Cultural da Unesco.
Esta actividade supón a continuación da peregrinación de Caminha ata Santiago de Compostela que máis de 100 veciños da Guarda e Caminha realizaron durante os primeiros meses de 2016. Desta volta o percorrido será dende Santiago ata Fisterra en catro etapas, que se realizarán os vindeiros catros sábados de outubro. En todas as etapas a hora de saída é ás 7.30 h dende a explanada do CEIP A Sangriña. O encontro cos participantes de Caminha e Viana do Castelo en Goián ás 8.00 h.
Os autobuses deixarán ós participantes na Estación de Autobuses de Santiago, dende onde se dirixirán ata á Praza do Obradoiro. A etapa dará comezo cara ás 10.30 h dende o Obradoiro e é convinte ir en grupo neste primeiro tramo, pois non hai sinalización. A partir da carballeira de San Lorenzo xa se atopan os indicadores que se irán seguindo.
O primeiro punto de agrupamento será a uns 12 quilómetros, no lugar de Augaspesadas (no Concello de Ames), onde se realizará o xantar. A previsión é chegar a partires das 13.30 horas. Alí hai un pequeno bar e tamén se atoparán os autocares para que os participantes podan coller as súas pertenzas.
Despois do xantar comezará o primeiro obstáculo da xornada: a subida ó Mar de Ovellas. Superada esta dificultade seguirase cara Ponte Maceira, sobre o Tambre, onde se volverán a agrupar. Para rematar os participantes dirixiranse a Negreira, final da etapa do sábado, onde se xuntarán na praza do Cotón, presidida por un bonito pazo e onde agardan os autobuses.
Cómpre ter en conta, igual que nas anteriores saídas, que cada un é responsable de respectar as normas que se deben gardar ben en tramos urbanos (semáforos, pasos de cebra….), en estradas (camiñar pola marxe esquerda) e en camiños forestais. Ademais débese levar algunha prenda reflectinte (cubre mochilas, brazalete, chaleco ou similar).
