A Cámara de Comercio de Tui elixe a Antón Fonseca Fernández, da empresa Bodegas Terras Gauda, como novo presidente da entidade
Onte tivo lugar na sede da Cámara de Comercio, Industria, Servizos e Navegación de Tui, o acto de constitución do novo Pleno. A sesión, que deu comezo ás 13 horas, estivo presidida polo Director Xeral de Comercio e Consumo da Xunta de Galicia, D. Manuel Heredia.
No acto, Antón Fonseca Fernández, da empresa Bodegas Terras Gauda, foi nomeado novo presidente. Así mesmo, durante a sesión, tamén tomaron posesión dos seus cargos, o resto de membros do Comité Executivo: Saúl Cuevas Faro, da empresa Darlim, e Emilio Estévez Martínez, da empresa Coplant, exercerán como vicepresidentes, primeiro e segundo respectivamente; Andrés Fernández Álvarez-Santullano, da empresa CZ Vaccines, exercerá como tesoureiro; e Roberto Pardo Diz, da empresa Plaintec, Jorge Trigo Somoza, da empresa CEAMSA, e Walter Álvarez Álvarez, da empresa Abanca Corporación Bancaria, exercerán como vogais.
Completan o Pleno, xunto cos membros do Comité Executivo sinalados anteriormente, Anxo Rodríguez Vidal, da empresa Industria Frigoríficas do Louro; Mónica Crisostomo Bicada, da empresa Ideas Peregrinas; Joaquín Cadilla Castro, da empresa ORPAGU; Rosana Canda Liño, da empresa Talaso Atlántico e María José Núñez Ramilo, da empresa Plymouth Rubber.
O novo presidente, agradeceu ao anterior equipo, e en especial ao seu antecesor, Gumersindo Alonso (Granitos de Atios), o esforzo realizado na xestión da entidade, e da mesma forma, puxo especial énfase no afán continuista do novo Pleno, destacando a mocidade de gran parte dos seus membros. Ademais, Antón Fonseca, quixo destacar o papel da Cámara, como entidade aglutinadora das grandes e pequenas empresas da demarcación e subliñou como un dos principais retos a conseguir, o traslado das oficinas da institución, ao novo edificio de Aduanas, situado na Avenida de Portugal. Por último, na súa alocución, descartou a fusión con outras cámaras da comarca, poñendo de manifesto a sustentabilidade e carácter transfronteirizo da Cámara de Comercio de Tui.
Ao acto tamén asistiron algúns dos alcaldes e alcaldesas de municipios da área de influencia da Cámara: Ánxela Fernández (O Rosal), Alejandro Lorenzo (O Porriño), Verónica Tourón (Salceda de Caselas), Enrique Cabaleiro (Tui) e Sandra González (Tomiño).
