A portavoz do BNG visitou o concello de Tomiño onde tamén mantivo unha xuntanza coa asociación de persoas usuarias das traídas de augas que defenden a xestión pública da auga fronte ao novo regulamento da Confederación Hidrográfica Miño-Sil.
Na súa visita a portavoz do BNG mantivo ao longo do día diversos encontros con axentes sociais e económicos do concello nos que tamén participaron a alcaldesa nacionalista, Sandra González e a deputada por Pontevedra, Montse Prado.
Na reunión coa asociación COXAPO, que aglutina a máis de 76.000 usuarios e usuarias das traídas de augas, Pontón comprometeuse a trasladar ao Parlamento os problemas derivados do novo regulamento da Confederación Hidrográfica Miño Sil e que ameaza a xestión pública da auga.“Existe un sistema de xestión comunitario que garante, cumprindo coa legalidade o subministro de auga a toda a poboación” e levaremos iniciativas ao Parlamento para que o que “existe na actualidade se regularice”, dixo.
Por outra parte, a portavoz do BNG propuxo impulsar o banco de terras para dar superficie aos viveiros do Baixo Miño, un sector, afirmou, do que viven máis de 500 persoas, entre elas moitas mulleres e que segue creando moitos postos de traballo. No encontro cos representantes do sector viveirista, a nacionalista lembrou que a iniciativa do banco de terras, impulsadas polo BNG, daba resposta á falta de superficie para a produción. Pontón lembrou que o concello de Tomiño conta co maior número de viveiros de Galicia e ocupa o quinto lugar no Estado. Este sector, da flor e horta vive un momento de gran crecemento polo que debe contar con terras que na actualidade non producen. Neste sentido, recalcou que é preciso poñer en marcha o banco de terras para dar resposta ás demandas dos e das viveiristas.
Asemade, a portavoz do BNG visitou o mercado remodelado no ano 2015 polo goberno de Sandra González e que conta coa denominación de “mercado excelente” outorgada pola Xunta de Galicia e a Escola municipal de Música á que asisten máis de 150 alumnos e alumnas de Tomiño e da localidade portuguesa, Vilanova de Cerveira, iniciativa transfronteiriza que leva o nome de “Gotas de auga por gotas de música”.
A visita a Tomiño finalizou coa participación da portavoz nacionalista nun acto aberto á cidadanía baixo o título “Os retos do nacionalismo do futuro”.
