Unha xoia arquitectónica en ruinas, na Lista Roxa do Patrimonio Hispania Nostra e que motivou unha importante demanda social.
O Conselleiro de Cultura, Román Rodríguez, anunciou fai uns días que o seu departamento investirá medio millón de euros para recuperar a Fonte de Troncoso, en Mondariz-Balneario. Este conxunto, deseñado polo arquitecto porriñés Antonio Palacios, fai parte do catálogo do patrimonio cultural galego.
A degradación á que estaba sometido motivou un importante movemento social a prol da súa recuperación
Segundo a previsión da Xunta, os primeiros traballos licitaranse o mes de novembro cun orzamento de 130.000 euros, e estarán destinados a consolidar o conxunto e evitar a súa degradación.
Para unha segunda fase está previsto o investimento doutros 400.000 que se destinarán á rehabilitación e recuperación desta obra, a partir dun proxecto elaborado polo arquitecto César Portela. De cara a esta actuación, está pendente a sinatura dun convenio co Concello de Mondariz-Balneario, actual propietario do conxunto.
O manancial fíxose noticia o pasado mes de abril de 2022 logo de fose subtraída do mesmo parte da varanda modernista conservada no lugar.
A Xunta de Galicia xa comprometera o seu apoio á recuperación do recinto en 2020, logo de que o Concello de Mondariz-Balneario conseguise a cesión do conxunto e dun informe do Consello da Cultura Galega a denunciar o estado de perigo no que se atopaba este inmoble.
SOS Fonte de Troncoso valora como “frustrante e decepcionante” que a Xunta de Galicia non financie a rehabilitación integral do edificio
O proxecto de rehabilitación integral ascende a 1 millón de euros, pero o goberno galego unicamente se compromete a investir 500.000.
Para SOS Fonte de Troncoso, o proxecto de rehabilitación integral da Fonte de Troncoso, redactado polo arquitecto César Portela, ascende a un millón de euros, polo que a Xunta de Galicia só se compromete a achegar a metade dos fondos necesarios, “desta maneira, a fonte non poderá ser rehabilitada na súa integridade, algo que temos que lamentar publicamente”.
Rehabilitación integral
Dende SOS Fonte de Troncoso confirman que este colectivo solicitou que se redactase e executase un proxecto de rehabilitación integral da Fonte de Troncoso, que inclúa os dous volumes nos que se divide o edificio, tanto o manancial pechado cunha reixa de función como o volume granítico destinado a oficinas e planta embotelladora. “Recuperar unha parte da fonte e non a súa totalidade non é de recibo. A Xunta e o Concello deben asumir a rehabilitación integral do edificio tal e como foi prevista no proxecto redactado polo arquitecto, sen deixar nada atrás”.
