A competición, que se celebrará o 10 de xullo en Praia América, constará de dous percorridos de 4.000 e 800 metros, e dúas probas de curta distancia para nenos de 50 e 150 metros. As inscricións están abertas ata o 4 de xullo
A VI edición da travesía a nado Costa Serena-Nigrán reunirá a preto de 500 nadadores inscritos entre as catro probas que se disputarán e consolídase como unha das travesías de longa distancia por excelencia de Galicia e con maior afluencia de nadadores da Comunidade Autónoma. A travesía terá lugar o vindeiro domingo 10 de xullo en Praia América e contará coa presenza de nadadores procedentes de todo o Noroeste peninsular e Portugal con idades comprendidas entre os 5 e os 70 anos.
Entre os participantes previstos figuran o triatleta Fernando Alarza, que acudirá á proba como preparación para as próximas citas das Series Mundiais e os Xogos Olímpicos de Río, e outros deportistas do Centro Galego de Tecnificación Deportiva de Pontevedra, acompañados polo seu adestrador Omar González.
Entre os nadadores que está previsto que participen figuran o triatleta Fernando Alarza, que acudirá á proba como preparación para as próximas citas das Series Mundiais e os Xogos Olímpicos de Río, e outros deportistas do Centro Galego de Tecnificación Deportiva de Pontevedra, como Antonio Serrat, Luís Miguel Velázquez, Carlos Brión, Camila Alonso, Joselyn Brea e Francisco Fernández Moldes, entre outros, acompañados polo seu adestrador Omar González.
A travesía constará de dous percorridos, que serán cronometrados por chip. O percorrido longo, no que se prevé unha gran participación con máis de 300 nadadores, consistirá nun triángulo de 4 quilómetros con saída e chegada na canle central de embarcacións. Os nadadores deberán bordear a baliza de Cabezo de San Juan, situada a 1,5 quilómetros de distancia, regresar cara á costa polo lado sur da praia e percorrer o último quilómetro en paralelo ao areal.
O percorrido curto, cunha distancia de 800 metros, disputarase en paralelo á costa, o que abrirá a participación a bañistas, curiosos e afeccionados á práctica deste deporte. A saída e chegada será nos mesmos puntos que a proba longa.
A competición de 4.000 metros comezará ás 11:30 horas, mentres que a de 800 metros arrincará ás 11:45 horas. No mar, colocaranse aboias de sinalización do percorrido para facilitar a orientación dos nadadores, así como embarcacións de Protección Civil, kaiaks e paddle surf.
Ademais, celebraranse dúas probas de curta distancia para nenos entre 5 e 13 anos, que se disputarán moi preto da beira. Haberá un percorrido de 50 metros (5 e 8 anos) e de 150 (9 a 13 anos). Estas probas comezarán ás 13:00 horas (50 metros) e 13:30 horas (150 metros).
Colaboración co Banco de Alimentos de Vigo
Este ano, a organización da proba colabora co Banco de Alimentos de Vigo. Todos os nadadores que queiran colaborar poderán entregar produtos non perecedoiros cando recollan a bolsa en Marina Estelas Panxón (entre as 09:00 e as 11:00 horas), que serán entregados a distintas Ong.
Retos de superación
Nesta edición, contarase coa participación de dúas persoas que son un exemplo de superación persoal. Por unha banda, o lalinense Álex Ferradás, que sofre unha lesión medular, repetirá por segundo ano consecutivo a súa participación na proba de 4.000 metros, que tentará completala a costas. Ademais, o mozo Ionan Inchusta, de 10 anos que naceu con síndrome de Down e síndrome de West e que apenas ve, nadará fóra de competición a distancia que separa o faro da beira (1.300 metros aproximadamente) acompañado polo seu adestrador, Peio Ormazábal, e varias embarcacións de apoio.
Máis premios
Na proba de 800 metros, entregaranse trofeos aos tres primeiros clasificados absolutos da categoría masculina e feminina. Na de 4.000 metros, este ano, como novidade, ampliouse o número de categorías para repartir máis premios entre os nadadores desta carreira. Ademais dos trofeos que se entregarán aos tres primeiros clasificados absolutos (masculina e feminina) establecéronse 12 categorías por idades. Os tres primeiros clasificados de cada categoría recibirán unha medalla. Os nenos que participarán nas probas de 50 e 150 metros recibirán unha medalla. Tamén se entregarán trofeos especiais ao nadador máis novo e de máis idade.
Inscricións
A zona de concentración dos nadadores será na Marinas Estelas Panxón, á beira das instalacións deportivas Dunas Gaifar, a partir das 09:00 horas.
Aqueles interesados en participar na travesía poderán realizar as inscricións na páxina web de Champion Chip Norte (https: www.championchipnorte.com) ata o 4 de xullo (incluído).
O prezo da inscrición da proba de 4.000 metros é de 19 euros e de 17 euros para a de 800 metros e inclúe: participación na travesía, camiseta conmemorativa, gorro, cronometraxe electrónica, avituallamiento, seguro de responsabilidade civil, asistencia médica, trofeo aos tres primeiros clasificados de cada categoría das dúas probas e medallas aos tres primeiros clasificados nas 12 categorías na proba de 4.000 metros e participación no sorteo de material deportivo.
As probas dos nenos teñen un custo de 10 euros e inclúe: camiseta, gorro, avituallamiento, asistencia médica, seguro de responsabilidade civil, medallas para todos os participantes e un xeado.
