Por segundo ano consecutivo as bibliotecas de Redondela organizaron na tempada estival un concurso fotográfico . O pasado ano, as bibliotecas dos lugares de vacacións foron o motivo central, mentres que este ano fórono as lecturas vacacionais.
A obra “El túnel” de Gustavo Barciela Balado , alzouse co premio do concurso fotográfico “Escenifica a túa lectura de verán” organizado polas Bibliotecas Municipais de Redondela a través das plataformas de facebook e instagram.
O xurado, constituído polos membros da Asociación de Amigos das Bibliotecas Municipais de Redondela, escolleu entre as 14 fotografías que cumprían os requisitos do concurso, das 29 que se presentaron en total.
A fotografía gañadora foi tomada na fortaleza de O Castro (Vigo) co libro de Ernesto Sábato “El túnel” como protagonista.
O premio consiste nun lote de libros e películas. A imaxe premiada, como todas as que participaron no concurso, expoñerase nas dependencias das bibliotecas, o Día da Biblioteca (24 de outubro).
