A Concellaría de Cultura organiza a presentación do libro “60 anos de crónicas redondelás” (unha ollada dende as coplas dos Maios), do redondelán Xesús Olimpio Giráldez Lera.
A publicación, editada pola Concellaría de Cultura, é unha viaxe a través do tempo que nos permite coñecer a historia de Redondela da man das coplas dos maios. Trátase dun percorrido que nos mostra a retranca e o bo humor que caracterizan as coplas dos Maios, pero tamén a historia e os asuntos que máis preocuparon á veciñanza redondelá dende os anos 50 do século pasado.
A presentación celebrarase o martes 22 de abril, ás 20.00 h, na sala II de exposicións do multiúsos da Xunqueira.
Nese mesmo espazo poderase visitar a mostra organizada polo Arquivo Audiovisual do Concello de Redondela, “Fotografías dos Maios ao longo do tempo”, composta de imaxes, rescatadas dos seus fondos, relativas á celebración da Festa dos Maios dende a década dos 50 ata hoxe en día.
A mostra inclúe 40 instantáneas pertencentes a veciños e veciñas do concello, que as cederon temporalmente para seren dixitalizadas e tratadas no Arquivo Audiovisual do Concello de Redondela, e diversos carteis dos Maios das coleccións de Olimpio Giráldez Lera e Amado González Cardama.
A mostra poderase visitar ata o 4 de maio.
