Inicio Pontevedra A garantía sanitaria, a flexibilización e a confianza, elementos clave para o...

A garantía sanitaria, a flexibilización e a confianza, elementos clave para o turismo no plan de reactivación do destino #Pontevedraprovincia

A garantía sanitaria, a flexibilización e a confianza, elementos clave no plan de reactivación do turismo Pontevedra provinciaA presidenta da Deputación de Pontevedra presentou o avance do Plan e as primeiras medidas, xa adoptadas pola institución, centradas na seguridade e confianza, na comercialización e adaptación da promoción do destino, na colaboración con eventos turísticos e no apoio e capacitación do sector

A garantía sanitaria, a flexibilización e a confianza serán “os tres grandes principios para ter éxito nun destino turístico” tal e como detallou Carmela Silva na presentación do avance do Plan de Reactivación do destino Pontevedra provincia, impulsado pola Deputación tralo estalido da crise sanitaria. A presidenta provincial, quen incidiu na importancia de converter á provincia nun destino seguro, sostible e inclusivo, adiantou os obxectivos, prioridades e estrutura do plan así como deu a coñecer as primeiras medidas, xa en marcha na Deputación, que se centran na seguridade e confianza na rede Info Rías Baixas, na comercialización e adaptación da promoción do destino, na colaboración con eventos turísticos e no apoio e capacitación do sector.

Da análise de tendencias realizadas mediante o Plan de Reactivación do destino Pontevedra provincia pódese extraer xa que para garantir o éxito é preciso cumprir con tres requisitos: “a garantía sanitaria e todo o que ten que ver coa seguridade e hixiene e a non masificación, a flexibilización en canto ás cancelacións ou cambios de plans e a confianza que serán os que determinen que as persoas turistas se decanten por un lugar determinado”, asegurou Carmela Silva. Neste eido, a presidenta fixo fincapé na importancia de estar “moi alerta e preparadas e preparados, de atender á demanda nova e adiantarnos provocando cambios na oferta” tendo en conta, amais que, nestes momentos, “estudos, portais de turismo e expertas e expertos nos sitúan como un dos destinos máis atractivos para este verán”.

Tendo en conta estes tres requisitos clave que se poden sacar xa á luz do avance do Plan de Reactivación do destino Pontevedra provincia, a Deputación de Pontevedra puxo xa en marcha as primeiras medidas para relanzar a actividade turística: seguridade e confianza na rede Info Rías Baixas, na comercialización e adaptación da promoción do destino, na colaboración con eventos turísticos e no apoio e capacitación do sector. Todas elas veñen estruturadas nos cinco eixos de actuación do plan que son o financiamento, aspectos legais e a fiscalidade; a prevención da seguridade, saúde e hixiene elaborando protocolos claros e plans de garantía sanitaria; a dixitalización e a competitividade centradas no liderado empresarial e fortalecemento a través da capacitación, innovación e emprendemento; o fomento da demanda de produtos e servizos turísticos da provincia ligados ao consumo local e a adaptación da promoción do destino Rías Baixas.

No que atinxe á seguridade e confianza na rede de oficinas Info Rías Baixas, a presidenta da Deputación de Pontevedra adiantou que se ten aprobado xa un plan de continxencia para as oficinas adheridas á mesma así como para a contratación de persoal, cun orzamento de 250.000 €. “Somos probablemente a primeira administración que aproba un plan de continxencia destas características”, asegurou a presidenta, para garantir a seguridade tanto das persoas visitantes que acoden ás oficinas de información turística como das que as atenden. No que respecta ao persoal das oficinas, Silva informou que a Xunta de Goberno vén de aprobar achegas para financiar a contratación de 27 persoas para tarefas de información nestas oficinas situadas en 21 concellos da provincia.

En canto á comercialización e adaptación da promoción do destino o aspecto prioritario é ofertar actividades, tal e como explicou Silva, “ligadas a experiencias locais e sostibles”, evitando aglomeracións e apostando pola natureza e espazos ao aire libre, polo turismo responsable, inclusivo e sostible, reforzando a marca Rías Baixas. Ao respecto da comercialización, Carmela Silva adiantou que esta semana licitouse, por valor de 116.000 € para o 2020 e prorrogable a outros tres anos máis, a asistencia técnica integral para a celebración de workshops e misións comerciais sectoriais no mercado nacional e norte de Portugal, en sintonía co Clúster de Turismo de Galicia.

En canto á promoción, recordou que están en marcha campañas de produtos de proximidade e o arranque da nova campaña de comercio local. Neste mesmo eido, está en funcionamento a adaptación do plan de comunicación do destino, centrado tamén no mercado de proximidade, ao que se destinan 150.000 euros para a promoción da provincia como destino seguro a través dunha nova campaña online e off line.

Outra das medidas en marcha é a colaboración con eventos turísticos, ben sexan deportivos, festivais musicais ou audiovisuais e relacionados coa organización de congresos e eventos (MICE). “Imos destinar recursos tanto aos que se celebren este ano como a aqueles que pasan ao 2021, para garantir que non se perdan eventos que teñen tanta capacidade de atracción turística”, asegurou a presidenta da Deputación.

Finalmente, entre as medidas xa lanzadas pola Deputación de Pontevedra para reactivar o turismo atópase a capacitación do sector e a necesidade de apostar pola dixitalización dos negocios para garantir a súa competitividade. Ademais, e neste aspecto, a presidenta explicou que “imos continuar coa formación online iniciada en abril cos establecementos adheridos ao SICTED, temos en marcha unha aceleradora que comeza a súa andaina a  partir do 25 de maio e lanzamos sesións formativas orientadas ao turismo”. Tamén informou que continuarán os asesoramentos a pemes e persoas autónomas con información práctica sobre cuestións fiscais, laborais ou de comercialización e adiantou que se está a elaborar un documento para facilitar e garantir a transparencia, viabilidade e supervivencia e tecido empresarial turístico da provincia, así como o emprego.

O Plan de Reactivación do destino Provincia de Pontevedra, no que se están a implicar entidades e empresas do sector turístico da provincia, aséntase en metodoloxías participativas. Deste xeito, tal e como explicou a presidenta provincial, en primeiro lugar realizouse unha análise de informes publicados por entidades de referencia no sector turístico como a OMT, Exceltur, Clúster de Turismo de Galicia, a Secretaría de Estado de Turismo de España e a Xunta de Galicia. Tamén se analizaron tendencias e actuacións que se están a desenvolver tanto a nivel nacional como internacional e realizáronse reunións e encontros con concellos da provincia, así como con expertos como o secretario de Turismo de Valencia Francesc Colomer.  Ademais completáronse as análises cunha enquisa ao sector turístico e axentes clave para coñecer de primeira man a súa situación e opinión, que contou cunha participación e resposta de ata máis de 200 empresas.

- Publicidade -

ÚLTIMA REVISTA

Publicidade

+ VISTOS

Publicidade
Publicidade



Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies