Inicio Baixo Miño A Guarda A frota galega do Encontro de Embarcacións Tradicionais chegará á Guarda en...

A frota galega do Encontro de Embarcacións Tradicionais chegará á Guarda en travesía conxunta desde as Cíes

A frota galega do Encontro de Embarcacións Tradicionais chegará á Guarda en travesía conxunta desde as CíesSerá a primeira vez na historia deste evento que os barcos do norte farán unha navegación tan longa en mar aberto, xa que sairán desde Muros. Para garantir a seguridade, o convoi contará co apoio do remolcador Sebastián de Ocampo.

O Encontro de Embarcacións Tradicionais de Galicia, que no seu décimo cuarta edición celébrase na Guarda do 11 ao 14 de xullo, será o primeiro da historia no que boa parte dos barcos realice unha travesía en mar aberto para aproximarse ao escenario de celebración. Esta singradura comporta unha gran dificultade á hora de manexar as unidades de máis de seis metros de eslora, xa que a maior parte delas foron deseñadas para a pesca e a cabotaxe en augas costeiras.

O punto de encontro para as embarcacións do norte, que parten desde Muros, e as do sur será as Illas Cíes, a cuxo abrigo pernoitará a frota para saír ao día seguinte cara á Guarda. Dado que a travesía obriga a navegar a máis de cinco millas dun abrigo ou praia accesible, decidiuse, xunto coas autoridades competentes, que a frota viaxase en convoi co apoio doutras embarcacións, entre elas o remolcador Sebastián Ocampo da Xunta de Galicia. Todo este percorrido previo quedará plasmado nun vídeo que mostrará a aventura por mar dos participantes galegos nesta décimo cuarta edición do Encontro.

Non será esta a única novidade respecto a edicións pasadas. A singular localización da localidade do Baixo Miño, entre o mar Atlántico e o río Miño, permitirá á organización mostrar aos asistentes o conxunto de tradicións marítimas e fluviais da zona, xunto co patrimonio galaico-portugués, de enorme riqueza histórica e descoñecido para moitos.

Outra das peculiaridades da cita guardesa é que as embarcacións permanecerán fondeadas, tal e como se facía historicamente no porto da Guarda, en lugar de amarradas a peiraos e pantaláns. Así mesmo, toda a frota estará disposta de tal forma que sexa posible a súa visión na súa totalidade desde calquera punto da enseada.

Unha cita imprescindible do 11 ao 14 de xullo

A exhibición das embarcacións tradicionais de Galicia, xunto con algunhas doutras localidades españolas e mesmo algunha foránea, forma parte dun amplo programa de actividades culturais e lúdicas, organizado por  Culturmar, Asociación  Piueiro, Instituto de  Estudos  Miñoranos e  Concello da Guarda, co patrocinio da Deputación de Pontevedra e da Xunta de Galicia, a través das consellerías de Mar, Medio Ambiente e Cultura e Turismo.

En Pasaia presentouse o vindeiro Encontro de Embarcacións Tradicionais de Galicia
No 2018 en Pasaia presentouse o vindeiro Encontro de Embarcacións Tradicionais de Galicia
© Culturmar

Actuacións musicais,  obradoiros, exposicións, gastronomía e  navegacións a bordo destes barcos que forman parte do patrimonio cultural conforman a atractiva oferta da celebración que terá lugar na Guarda do 11 ao 14 de xullo e que hoxe se presentou de forma oficial no Museo  do  Pobo  Galego, na capital galega.

Intervención das autoridades no acto de presentación

O presidente de  Culturmar, Manuel García  Sendón, referiuse na súa intervención á importancia de salvagardar o patrimonio marítimo galego e neste sentido destacou a importancia do Encontro como “festa reivindicativa  e de exhibición patrimonial protagonizada pola nosa frota”.

García Sendón explicou que a idea de organizar esta celebración cada dous anos nunha vila mariñeira diferente, “é laboriosa, porque sempre partimos de cero, pero axúdanos a dar a coñecer a nosa cultura por toda a xeografía galega”.

Pola súa banda, o presidente da Asociación  Piueiro, Joaquín  Cadilla, manifestou o seu agradecemento a  Culturmar e ao pobo da Guarda, “que se está envorcando nos preparativos da celebración”.  Cadilla, que fixo referencia no seu discurso a Valentín Paz Andrade e Eliseo Alonso, sinalou que o traballo que está a realizar  Piueiro desde a súa constitución ten como obxecto preservar o noso patrimonio “porque non queremos que se perda a alma deste pobo”.

O alcalde da Guarda, Antonio Lomba, e o deputado de Turismo da Deputación de Pontevedra, Santos Héctor Rodríguez, destacaron pola súa banda o acertado da elección da Guarda como sede do Encontro, “tanto pola súa historia como polo seu presente vinculado ao mundo do mar”, como apuntou Santos Héctor.

Por último, a conselleira  do Mar, Rosa Quintana, anunciou que a Xunta traballa nun plan de acción único para a conservación do patrimonio marítimo-pesqueiro. Segundo sinalou a conselleira prevese que a parte de inicial deste plan estea lista a mediados de 2020 e que se comece a actuar no 2021.

Ademais das autoridades que interviñeron no acto, á presentación en Santiago tamén asistiu o presidente de Portos de Galicia e o tenente alcalde da Guarda, así como membros de  Culturmar e  Piueiro.

- Publicidade -

ÚLTIMA REVISTA

+ VISTOS

SÍGUENOS

692FansGóstame
308SeguidoresSeguir

ETIQUETAS

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies