O Orzamento Participativo Transfronteirizo Cerveira-Tomiño foi analizado como unha experiencia innovadora e útil
Fernando Nogueira, presidente da Câmara Municipal de VIlanova de Cerveira e Sandra González, alcaldesa de Tomiño, foron os convidados do segundo día do IV Encontro Ibérico de Democracia e Orzamentos Participativos, que se celebra na Coruña, entre 4 e 6 de xullo. O Orzamento Participativo Transfronteirizo Cerveira-Tomiño foi analizado como unha experiencia innovadora e de éxito.
Dando continuidade aos encontros celebrados desde 2012 nas localidades de Odemira, Mollina e Punta Delicada, o IV Encontro Ibérico ten como obxectivo ser un espazo de intercambio das diversas experiencias dos Orzamentos Participativos aplicados en toda a Península Ibérica e illas, así como nalgunhas cidades da América Latina.
Ao longo de tres días, o encontro desenvólvese entre conversas abertas, reunións de traballo, workshops, conferencias, mesas redondas, presentación de libros e mesas de experiencias. E foi nesta vertente que o alcalde de Vila Nova de Cerveira, Fernando Nogueira, e a alcaldesa de Tomiño, Sandra González, foron convidados pola organización a compartir e testemuñar a experiencia do Orzamento Participativo Transfronteirizo, que xa vai na segunda edición, e cuxa adhesión creceu significativamente.
Tanto a alcaldesa de Tomiño, como o presidente da Cámara de Cerveira, explicaron que a cooperación transfronteiriza permite aproveitar equipamentos comúns e levar a cabo proxectos que de forma unilateral, non serían viables. “Para nós, o OPT é un medio para fomentar a implicación entre as dúas comunidades veciñas”, comentou Sandra González.
Como resultado deste traballo de reflexión en común do IV Encontro Ibérico de Democracia e Orzamentos Participativos, o Concello da Coruña na calidade de organizador da iniciativa, en estreita colaboración cos socios, pretende avanzar cunha axenda compartida, dando continuidade á democracia participativa.
