A Eurocidade Tui-Valença promocionarase dende mañá e ata o domingo na BTL de Turismo de Lisboa cun posto propio no que dar a coñecer os múltiples atractivos que presentan as dúas cidades a unha e outra beira do Miño.
O Camiño Portugués de Santiago será un dos eixos centrais desta promoción tendo en conta que Valença é o último punto deste traxecto en territorio portugués e Tui o primeiro en Galicia, así coma o importante auxe experimentado por esta vía de peregrinación.
Pero amais os recursos naturais co río Miño, o Parque Natural do Monte Aloia, o Monte Faro, xunto á gastronomía propia das dúas cidades, o conxunto histórico de Tui, a fortaleza de Valença, os valores patrimoniais e histórico e as actividades conxuntas que organizan en diversos ámbitos estarán tamén presentes na BTL.
O alcalde de Tui, Enrique Cabaleiro, e o presidente da Cámara de Valença, Jorge Salgueiro, desprazarnase mañá ata Lisboa para participar na feira, mentres que o concelleiro de Turismo, Laureano Alonso, ten previsto viaxar na fin de semana.
O posto da Eurocidade, a segunda vez que Tui-Valença contará con espazo propio na feira, contará con maquetas das dúas cidade e da vella Ponte Internacional, así coma con diverso material promocional das dúas cidades.
