O Parador de Tui foi punto de encontro para presentar publicamente os proxectos de preservación e valorización do río Miño que aspiran a acadar 7,5 millóns de euros de fondos europeos
Coincidindo co aniversario do Tratado de Lisboa de 1668 polo que se firmou a paz entre España e Portugal, a Deputación de Pontevedra reuniu hoxe no Parador de Tui aos alcaldes dos concellos do río Miño galegos e portugueses e a investigadores e representantes sociais da zona nun acto simbólico para potenciar a cooperación entre ambas partes da fronteira.
A xuntanza serviu para dar a coñecer os proxectos de preservación e valorización do río Miño transfronteirizo cos que se pretenden obter 7,5 millóns de fondos europeos dos programas Interreg V A-POCTEP e tamén para asinar a ‘Declaración de Tui’, un documento que compromete á institución provincial e á CIM Alto Minho, organismo homógolo portugués, a seguir traballando en conxunto.
No acto, que comezou ás 11 da mañá, estiveron presentes a presidenta da Deputación, Carmela Silva, así como o presidente da CIM Alto Minho, José María Costa. Tamén participaron o deputado de Cooperación Transfronteiriza, Uxío Benítez, así como os rexedores de A Guarda, O Rosal, Tomiño, Tui, Salvaterra, As Neves, Arbo, Crecente, Melgaço, Monçao, Valença, Paredes de Coura, Vila Nova de Cerveira e Caminha.
Así mesmo, houbo representantes da Xunta de Galicia, da Universidade de Vigo, da Fundación Centro de Estudos Eurorrexionais, da Confederación Hidrográfica Miño-Sil, da Comandancia Naval de Tui e de Porto de Caminha, de Adriminho, da Agência Portuguesa do Ambiente, da Fundación Monte Aloia ou de Ponte nas Ondas, entre outros.
