A Deputación de Pontevedra oferta 2.200 prazas no Centro de Vacacións da Lanzada en 11 quendas de campamentos: a primeira, do 21 ó 27 de xuño, e a última, do 30 de agosto ó 5 de setembro.
A Deputación contratará unha empresa, por 225.000 euros, para encargarse da asistencia técnico-educativa dos campamentos, así como da alimentación. Entre outras actividades haberá: xogos e deportes; actividades na praia; aire libre, natureza e medio ambiente; actividades artísticas; teatro e contacontos; bailes e outras actividades culturais.
Ós campamentos poderán acudir nenos residentes nos concellos de Pontevedra e nacidos entre 2002 e 2007. O prazo de presentación das solicitudes rematará o 1 de abril e o prezo será de 83,60 euros por neno.
Segundo informaron hoxe en rolda de prensa o presidente da Deputación, Rafael Louzán, e a deputada Marta Iglesias, a adxudicación das prazas farase por sorteo: reservaranse 30 prazas para os nenos do Centro Príncipe Felipe; terán prioridade os que non asistisen o ano pasado; asignaranse, por quenda, 100 prazas para nenos e 100 para nenas; e cando un menor que non fose o ano pasado obteña praza e teña irmáns, para favorecer a conciliación familiar, estes tamén obterán praza na mesma quenda aínda que xa fosen o ano pasado.
Louzán lembrou que os campamentos pasaron de contar con 400 nenos de concellos do interior, cando el chegou á Deputación, ós 2.200 que agora se ofertan para todos os concellos, de costa e interior.
As prazas asígnanse a cada concello en proporción á súa poboación.
