O Consorcio da Zona Franca de Vigo acolleu durante os días 12 e 13 de setembro a un proxecto europeo de referencia na dixitalización da cadea de valor agroalimentaria e a eficiencia dos recursos naturais e produtivos.
Baixo o nome BBTwins, un conglomerado internacional con representantes de 7 países europeos desenvolveu unha innovadora plataforma de xemelgo dixital que aplica tecnoloxía de vangarda ao proceso completo do sector, desde a orixe ata o consumidor final.
Trátase dunha solución pioneira, con protagonismo empresarial e talento vigués, que marca un antes e un despois nun sector económico estratéxico. Este proxecto, que aplica tecnoloxía innovadora para crear unha réplica dixital en tempo real dos procesos físicos da industria agroalimentaria optimizando recursos e posibilitando mellores resultados, pode ser un modelo replicable noutros sectores e cadeas de produción, de aí a súa importancia a futuro.
As instalacións do Consorcio da Zona Franca de Vigo foron escenario da cuarta convención semestral de avaliación de seguimento do proxecto, tras visitar inicialmente Finlandia, España (Logroño) e Grecia. A vocal substituta do delegado especial do Estado no Consorcio, Ana Mª Mejías Sacaluga, coñeceu de primeira man a avaliación e detalles do proxecto agora que se atopa no seu ecuador de 2 anos e trasladar aos responsables do proxecto as potencialidades e oportunidades de negocio que brinda Vigo, o Consorcio e a súa área de influencia.
A esta reunión de seguimento do vixésimo oitavo do proxecto acudiron 35 investigadores e científicos, dos 7 países europeos inmersos no proxecto. A axenda da convención compóñena distintas xornadas técnicas, grupos de análises e debate, reunións bilaterais e o traballo no plan de explotación do programa para os próximos meses.
Actualmente estanse desenvolvendo en paralelo 2 xemelgos dixitais, un para o sector porcino en España e outro para o sector da froita (pexego e nectarinas) en Kozani, Grecia, integrando unha gran variedade de tecnoloxías no xemelgo dixital como IoT, Intelixencia Artificial, Visión Artificial (en rango visible e hiperespectral), Cloud computing, Blockchain ou Realidade Virtual. Este proxecto, cun horizonte de execución de 4 anualidades (2021-2025), dá resposta a unha necesidade de dixitalización de sectores tradicionais e está profundamente aliñado cos obxectivos de desenvolvemento que promove a Unión Europea para os estados membros.
