O Delegado da Zona Franca de Vigo, David Regades presentou a nova edición da aceleradora, que apoiará ás empresas na súa internacionalización de forma gratuíta durante 7 meses
O Consorcio da Zona Franca de Vigo, abriu a inscrición para a 7ª edición de ViaExterior, a aceleradora multisectorial deseñada para preparar e acompañar ás pemes galegas na súa expansión internacional. Ata o 1 de outubro, as empresas interesadas poderán formalizar a súa participación a través da páxina web oficial http://viaexterior.com.
Na súa presentación, David Regades, destacou “o ambicioso programa deste ano”, cun enfoque interdisciplinar que combina accións de apoio con dinámicas prácticas, formación, mentoring, intelixencia competitiva e asesoramento personalizado, con acompañamento dun/a titor/a individual ao longo dos 7 meses do proceso de aceleración internacional. Regades incidiu no éxito do programa que ata a data apoiou a un total de 120 empresas galegas, facilitándolles o acceso a novos mercados. “Más de 90% das empresas que participaron connosco foron capaces de internacionalizarse Cremos firmemente no potencial das pemes de Galicia. Para Zona Franca as empresas son a clave, son o músculo e o gran activo que ten este proxecto”.
Os participantes de edicións anteriores destacan da aceleradora de Zona Franca a calidade do equipo docente, as ferramentas, o asesoramento personalizado e mesmo a posta en marcha de proxectos de colaboración con outros participantes. “Non hai mellor testemuño para valorar a importancia de Vía Exterior, engadiu o delegado, que as opinións dos que xa participaron. Eles son o noso mellor aval”.
ViaExterior brindará ás empresas seleccionadas, de forma totalmente gratuíta, o apoio dun equipo especializado de 30 profesionais, expertos en áreas crave como comercio exterior, fiscalidade, negociación intercultural, márketing e comunicación. Estes profesionais acompañarán ás empresas cun tratamento completamente personalizado para o desenvolvemento e execución das súas estratexias de internacionalización, axudándoas a explorar novos mercados, ampliar a súa rede de contactos e acceder a oportunidades de financiamento.
O programa, que levará a cabo de novembro do 2024 a maio de 2025, foi presentado nas instalacións do Consorcio Zona Franca en Vigo que permitiu ás empresas coñecer en detalle o funcionamento do programa e os beneficios da súa participación, por exemplo entrar en novos mercados, conseguir certificacións, preparar a asistencia a feiras internacionais ou creación de joint ventures, entre outros. O próximo 11 de setembro presentarase en Pontevedra, ás 9:30 h nas instalacións de AEMPE, e o día 19 en Ourense, ás 12:30 h, na Asociación Empresarios Polígono San Cibrao.
