A artista Lourdes Alonso, usuaria do Centro Juan María de Nigrán, fixo entrega esta mañá en Porto do Molle dunha obra na que plasma a súa particular visión, con elementos primaverais, do Centro de Negocios do parque empresarial. Durante presentación do cadro, a pintora estivo arropada polo alcalde de Nigrán, Juan González, a delegada do Estado no Consorcio da Zona Franca de Vigo, Teresa Pedrosa, e o presidente do Centro Juan María, José Santoro, así como o equipo de Reporteiros en Rede, entre outras persoas.
O lenzo, de grandes dimensións, preside unha sala de esparexemento no primeiro andar do edificio
Lourdes, de 37 anos e veciña de Nigrán, amosou o seu agradecemento polo encargo da obra, un reto no que traballou durante seis meses dadas as amplas dimensións do lenzo, de 3 metros de ancho por 1,60 metros de alto, e que agora preside unha sala de ocio no primeiro andar do edificio. Da súa obra, Lourdes destacou que elixira cores alegres e flores que representan a primavera no parque empresarial de Porto do Molle.
A Delegada, Teresa Pedrosa, agradeceu o traballo realizado e dixo que “esa alusión á primavera vai servir para que os emprendedores que comezan en Porto do Molle a andaina dos seus negocios pensen que tamén en Nigrán van ver florecer as súas empresas”.
O presidente do Juan María, José Santoro, agradeceu a colaboración do Consorcio co Centro e fixo público o seu desexo de que este sexa o inicio doutra serie de encargos ás persoas que traballan nos seus talleres ocupacionais.
Pola súa banda, o alcalde de Nigrán, Juan González, dixo que se para Nigrán é un orgullo albergar ao parque empresarial tamén o é ter un centro como o Juan María ao que nunca poderán agradecer todo o traballo que realizan tanto os seus educadores como os alumnos e as súas familias. “Ver este cadro cheo de enerxía colocado aquí, no Centro de Negocios, vai dar ánimos a todos” declaro o Alcalde quen lembrou que “Lourdes aínda ten pendente facer unha obra para o Concello de Nigrán e destacou que a artista xa realizou unha exposición itinerante sobre diferentes espazos da localidade dende a súa propia perspectiva.
O acto de entrega deste mural tamén foi gravado por participantes do taller de comunicación audiovisual do Juan María.
