Como viña sendo habitual nos últimos anos, o 1 de maio celebraríase a tradicional romaría “Os nosos fariñeiros. Burros e muíños” que organiza a Asociación Muiñeiros do Río Tripes en Tui. Este ano propón unha Xornada de Portas Abertas nos muíños do Tripes, unha oportunidade para coñecer este conxunto etnográfico de gran valor
Debida a situación de pandemia que estamos a sufrir non poderá ter lugar o evento, tal e como xa ocorreu o ano pasado, pero aínda así, a asociación non quere deixar de conmemorar esta data e continuar coa súa labor de difusión do patrimonio da cultura muiñeira.
Tralo éxito das xornadas de portas abertas que realizaron na pasada semana santa, vólvense a abrir os muíños a todo o que queira acercarse a coñecer este fermoso entorno, onde a natureza e a etnografía conforman un conxunto singular de elevado valor paisaxístico e cultural.
Sempre mantendo as medidas sanitarias oportunas e estipulando unha capacidade máxima para os interiores dos muíños de dúas persoas, os membros da asociación transmitirán ao visitante as peculiaridades destas construcións, da súa historia e da vida das xentes que as fixeron posibles.
Os muíños estarán abertos o sábado día 1 e o domingo 2 de maio,
en horario de 10:00h a 14:00h e de 16:00h a 20:00h.
