·Publicidade ·spot_img
InicioBaixo MiñoUnha ruta de sendeirismo unirá as parroquias de Burgueira e Loureza no...

Unha ruta de sendeirismo unirá as parroquias de Burgueira e Loureza no municipio de Oia

Unha ruta de sendeirismo unirá as parroquias de Burgueira e Loureza no municipio de Oia
Pozo do Arco

O Concello de Oia contrata a realización dunha ruta de sendeirismo que unirá as parroquias de Burgueira e Loureza. Terá un percorrido circular de 12,5km, pasando por puntos de interese patrimonial e paisaxístico

O Concello de Oia vén de contratar a realización dunha nova ruta de sendeirismo sinalizada no municipio, neste caso un sendeiro circular de 12,5 km que unirá diversos puntos de interese natural, cultural e paisaxístico das parroquias de Burgueira e Loureza.

O itinerario unirá diversos espazos naturais e de lecer nas inmediacións do río Tamuxe, elementos do patrimonio cultural local e puntos desde os que gozar de vistas ao val do Tamuxe e á desembocadura do río Miño no océano Atlántico. Entre os principais puntos de interese atópanse as pozas de Bugalleira e Loureza, a área de lecer de Pozo do Arco, os núcleos de Loureza, Refoxos e Burgueira, as igrexas de Loureza e Burgueira e diversos elementos etnográficos tales como muíños hidráulicos, pontes e cruceiros.

Unha ruta de sendeirismo unirá as parroquias de Burgueira e Loureza no municipio de Oia
Antigo Muiño Refoxos

Para o seu trazado aproveitaranse espazos, camiños e pistas xa existentes e en bo estado de mantemento: algúns de titularidade municipal e outros, a través da colaboración coas comunidades veciñais de montes de Loureza e Burgueira, de propiedade comunal.

A iniciativa conta cun orzamento total de 24.177,94 euros (IVE incluído). Deste total, 20.000 euros serán financiados a través dun convenio de cooperación entre o Concello e a Secretaría Xeral para o Deporte da Xunta de Galicia, mentres que a cantidade restante será asumida con fondos propios municipais.

Unha ruta de sendeirismo unirá as parroquias de Burgueira e Loureza no municipio de Oia
Loureza

Esta actuación incluirá o deseño da ruta, a instalación de diversos elementos de sinalización direccional (que permitirán percorrela de xeito autónomo, sen necesidade de empregar planos ou GPS) e o deseño e colocación de dous paneis interpretativos con información de interese sobre os principais atractivos do sendeiro.

Aposta pola valorización patrimonial

Con esta nova ruta sinalizada o Concello dá continuidade á súa aposta pola valorización do patrimonio natural do municipio, neste caso centrándose especialmente na marxe esquerda do río Tamuxe ao seu paso polas parroquias de Burgueira e Loureza.

Nesta liña de posta en valor patrimonial, a Administración local lembra a creación e sinalización de diversas rutas de sendeirismo nos últimos anos (a Ruta do Mosteiro en 2019 e as tres rutas da Valga -Curro da Valga, Montes de Loureza e Muíños do Calán- en 2020) así como a posta en marcha da programación de rutas guiadas “Descubre Oia” desenvolvida a pasada primavera.

O Concello de Oia ten a intención de seguir nesta liña de creación de equipamentos e oferta de lecer ao aire libre arredor do patrimonio natural; accións das que pode beneficiarse tanto a veciñanza como os visitantes interesados no contacto coa natureza, a actividade física e o turismo activo.

- Publicidade -spot_img

Publicidade



Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies