A Presidenta da Deputación de Pontevedra, Carmela Silva, asegurou na inauguración do festival que “o mar está no ADN dos vigueses e viguesas”
A Presidenta da Deputación de Pontevedra, Carmela Silva, subliñou hoxe na inauguración do “Sea Fest” que é o transmisor a todo o mundo de que “Vigo é a capital da pesca mundial pola súa industria pero tamén pola gastronomía vinculada aos produtos pesqueiros”. Silva inaugurou xunto ao alcalde de Vigo, Abel Caballero; o presidente da Cooperativa de Armadores, Javier Touza; a conselleira de Pesca e os representantes de A Banca e do Porto de Vigo a segunda edición do “Vigo Sea Fest”, que en máis de vinte mil metros cadrados dos xardíns do Náutico, mestura peixe, gastronomía e música.
Para a Presidenta da Deputación “son días felices para a cidade de Vigo” porque van ser un perfecto escaparate dos produtos pesqueiros que captura a frota viguesa senón “tamén pola mestura da gastronomía cunha oferta cultural que vai inundar a cidade”. Silva asegurou que “no ADN dos vigueses e das viguesas está o mar e neste festival somos capaces de ensinar ao mundo como somos capaces de transformar os nosos produtos cos cociñeiros e cociñeiras que levan o nome da cidade por onde van mostrando ademais o noso potencial tamén no eido cultural”.
Carmela Silva recoñeceu que o sector pesqueiro vigués foron quen “de xerar unha potencia industrial construíndo unha economía, un importante crecemento económico, creando moito emprego e apostando pola sostenibilidade, polo medio ambiente, porque non hai economía de futuro se non se aposta pola sostenibilidade. E ademais en Sea Fest a muller está moi presente na cultura e na gastronomía facendo unha aposta por algo, que hoxe, en día reclama a sociedade”. “Os vigueses están orgullosos deste sector pesqueiro como puidemos comprobar onte nun percorrido pola tarde polo recinto feiral”, subliñou Silva.
Por último agradeceu o traballo feito pola Cooperativa de Armadores con esta segunda edición do “Sea Fest” que está situando a cidade como unha referencia mundial. “Imos converter esta festa nunha referencia gastronómica en Europea porque cando esta cidade ten unha idea faino todo ao grande e é unha referencia de éxito. A miña noraboa pola vosa idea, que estou segura que ano a ano vai seguir crecendo e poñendo a Vigo na cúspide de Europa”, subliñou a Presidenta da Deputación.
Pola súa parte, o alcalde de Vigo, Abel Caballero, agradeceu a Carmela Silva o seu compromiso con esta iniciativa que sitúa a Vigo nunha referencia mundial no sector pesqueiro e asegurou o apoio das institucións para seguir consolidando este festival.
Esta segunda edición do “Vigo Sea Fest” celébrase nos xardíns do Náutico ao longo deste fin de semana e 18 cociñeiros e cociñeiras presentan diversas preparacións culinarias con peixes, capturados pola frota viguesa, e que non son moi coñecidos polos consumidores, ademais de diversas actuacións musicais.
