Do 25 ao 27 de abril Sanxenxo concentrará a destacados científicos procedentes de diferentes universidades para analizar os avances que se produciron dentro do ámbito da neurociencia nos últimos anos e a revolución que estes descubrimentos supuxeron a nivel clínico, de investigación e social.
Na proposta de Sanxenxo como sede deste evento tivo moito que ver Roberto Carlos Agís, concelleiro de Cultura e integrante da SENC, que ademais se puxo a disposición da organización para colaborar na oferta de lecer deseñada para completar o programa e que está aínda pendente de concretar coa opción de elixir entre unha ruta de sendeirismo polo termo municipal, unha ruta guiada en catamarán pola Ría de Pontevedra, unha excursión á illa de Ons ou unha visita guiada a Combarro e Pontevedra.
Investigadores das Universidades da Coruña e de Vigo, así como do Hospital Nacional de Parapléxicos de Toledo son os promotores de que Sanxenxo fose seleccionada pola SENC para a celebración dun evento que durante tres días permitirá aos profesionais da neurociencia poñer en común os avances das súas investigacións.
O evento está exposto en dous ámbitos diferentes. Por unha banda os relatores, científicos provenientes de centros tan diversos como Oxford ou Lausanne, ofrecerán dúas conferencias plenarias por día e durante as ceas investigadores senior mesturaranse con outros máis novos e cada mesa terá o seu tema de discusión. Ao final da mesma aquelas mesas seleccionadas han de expoñer en 5 minutos as conclusións máis relevantes da discusión. O idioma elixido para o desenvolvemento deste programa de traballo é o inglés.
Pero paralelamente ao programa profesional, o evento inclúe actividades que buscan abrir a ciencia á sociedade e por iso programaron un café teatro científico sobre neurociencia nunha cafetería aínda por determinar.
Esta actividade sería realizada por membros do NEUROcom, o día antes do inicio das xornadas e serviría de presentación das mesmas en Sanxenxo.
Ademais, prevén a visita a un colexio, cunha charla dirixida aos estudantes e por último unha conferencia divulgativa aberta ao público que posiblemente se realice o último día e que será impartida por un dos relatores invitados. Estas actividades serán realizadas en castelán.Os interesados en coñecer máis detalles sobre o contido deste evento poden facelo a través da ligazón .
